علیرضا فرشي نين آردا قالمیش دویقولاری - اؤزآي اؤتگون

سون زامانلار سايين علیرضا فرشي به يين چوخ هيجان دولو و کیمی کز ده (بعض ده) سايقي ديشي يازيلارينا راستلانماقداييق. سيمگه سورونو ايله ايلگيلي اولاراق يازديقلاري ديکتاتورجاسينا دوروشو بو افندي نين دونياگؤروشونده اسکي ايستيبداد ده يه رلري نين يووا سالديغيني ايثباتلادي. سانکي قيرميزي سيمگه يه قارشي چيخانلار اولوسال ايستنجه (ايراده یه) و اولوسال يازقييا (سرنوشته) قارشي چيخيرميشلار کيمي فرشي به يين يازيسيندا و بيچه مينده (اوسلوبوندا) گؤستريلدي. تک ندني ده فرشي به يين بو ايدي کي، خالق بو سيمگه ني سئچميش! فرشي به يه سورماق لازيم کي، سون مين ايلده بير کره ده اولسون بو خالق دوغرو بير شئي ياپميشمي کی، ایندی ده یاپمیش اولسون؟ بيردنمي عاغيللاندي بو خالق کي، بيزيم خبريميز اولمادي؟ داها اسکي چاغلاري خاطيرلاماقدا بلکه فرشي به يين حافيظه سی يارديمچيسي اولمايا بيلر. آنجاق سون يوز ايلي سؤيله يه ليم.

بو خالق اؤز دؤولتي اولان قاجار-تورک دؤولتيني دئويريب يئرينه فارس دؤولتي قوردو. بو خالق ۲۲ بهمن اينقيلابيندا هئچ بير اولوسال پروژه سي اولمادان جانيني قوربان وئريب بير ديکاتورو دئويريب داها قداريني ايش باشينا گتيردي. بو خالق کؤنوللو بيچيمده خومئيني نين بويروغونا لببئيک دئييب جبهه لرده گنجلريني هئچه قوربان ائتدي. بو خالق اؤز باشينا هانسي بلالري گتيرمه ييب کي؟ بونلار بير يانا دورسون. خالقين چوغونلوغونون خطا ائتمه يه جگي آديندا بير قورال يوخدور. هيتلئري آلمان خالقي بؤيوک چوغونلوق ايراده سي ايله ايش باشينا گتيردي. بو کيمي اؤرنکلر چوخدور تاريخده. ايندي اگر خالق سون يوز ايلده کوممونيزمين سيمگه سي اولان رنگي اؤزونه قورتولوش رمزي کيمي سئچيرسه، دئمک بو خالق، تاريخي، خطالارلا دوپ- دولو اولان بو خالق روس خالقي نين دئنه ديگي و قارانليغا گؤمولدويو تجروبه ني يئنيدن دئنمک ايسته يير.

بير حالداکي بونلارين ايديعاسي نين تام ترسينه اولاراق خالقين بو سيمگه سئچيميندن خبري يوخدور. خالق آنلاييشي چوخ گئنيش آنلاييشدير و تراکتور ياريشلارينا قاتيلان ۸۰-۷۰ کيشيدن عيبارت دئييل خالق. (منجه «تراکتور» دئييلمه ليدير. چونکو «تراکتور» فارسجا سؤز دئييلدير. بير ده ميللته دئمک لازيم کي، اؤزونو ائييتسين و سؤزو دوزگون تلففوظ ائله سين. چونکو هر سؤزون دوغرو تلففوظ ائدیلمه سی گرکير. دوغرو تلففوظده یارار وار. «تيراختير»، «تئراختیر»، «تراخدير» دئمکله هئچ بير ايره ليله یيش اولماز. بونلار بوشلوقدان و هئچليکدن يارديم اومماقدان باشقا بير شئي دئييلدير. اگر فرشی به ی بیرله شیک آزربایجان ایسته ییرسه، قوزئیده یازی دیلی بیچملنمیشدیر و اونا اویمالییق. اوردا دا «تراکتور» دئییلیر.)

قيرميزيلارين آنا ندنلري بودور کي، بابک خوررمدين قيرميزيچي ايميش. بابک خوررمدي نين گئنل تورک کيمليگي ايله باغلي باغلانتيلاري حاقدا هئچ بير تاريخي قايناق اورتادا يوخدور. تورکلوک سيمگه سي مدني اولاراق گئنيش بير کيمليک چاغريشديريرکن بابک خوررمدين ميکروموحيطين چابالاريندان باشقا بير شئي دئييلدير. هله بونلار بير يانا دورسون، باشقا بير زامان بو قونونون اوزرينده دارتيشماق مومکوندور.

علیرضا به ي فرشي نين سون يازيسي تامامن ايچ ساواش ياراتماغا يؤنلميشدير. «آزربايجانين بير بايراغي وار» دئينلری الشدیرمک بیرلیگیمیزه قارشي چیخماق ایمیش! تاريخي گئرچکلري، اولوسلار آراسي حوقوق آنلاييشيني يا بيلمه يه رک، يا دا گؤز آردي ائده رک بؤيله اوتوپيک بير ياناشمادا بولونان فرشي به ي، ۱۹۹۱- جي ايلده بللي ائورنسل قوشوللاردان دولايي اورتايا چيخان خيالپرست، رومانتيک «ميلتچي»لري خاطيرلاتماقدادير.

فرشي به يين دوشونجه لري، دویغولاري ۱۹۹۱- جي ايلده ايليشيب قالميشسا، بونو دوغال اولاراق قبول ائتمک اولار. لاکين ۱۹۹۱-جي ايلين گليشمه ميش، ائورنسللشمه ميش يؤره سل دويغولاري ايله آرتيق گونوموزده يوزوملاردا بولونماق هم کئچرلي دئييل، هم ده يانيلقيلي بير يؤنته مدير. ساده بير اؤرنکله فرشي به يين بوتون ايديعالاريني چوروتمک مومکوندور. ايکي کوره وار. ايکي آلمانييا وار ايدي. باخماياراق کي، اونلار باغيمسيز دؤولت ستاتوسونا صاحيب ايديلر، آنجاق اؤزلري نين آيريجا بايراقلاري وار ايدي. کوره دؤولتلري هله او شکيلده داوام ائدير. حتّی عئيني ميلت اولان بو ايکي دؤولت بير- بيرينه دوشمنديرلر ده. بيزيم کي، هئچ بير ستاتوسوموز ايران ايچينده مؤوجود دئييل. اؤيله ايسه، فرشي به يين فانتئزيلري نئجه اولور کي، هم ايراني پارچالايير، هم ده درحال ايکي آزربايجاني بیر تک بایراق آلتیندا قورصتی قاچیرمادان همن بيرلشديرير! اويسا کی، قوزئي آزربايجانين نه ايقتيصادي دورومو، نه سياسي دورومو و نه ده سوسيو- پسيکولوژيک دورومو بونا حاضير اولمازکن، فرشي افندي فارس فاشيزميني بير يانا بوراخيب و گونئي آزربايجاندا فرقلي بايراق و فرقلي يؤنته م دوشوننلري دوشمن اولاراق گؤرور و سانکي تام بيرلشمک اوزره ديلر کي، گونئي آزربايجان اوچون فرقلي بايراق دوشوننلر بو بيرلييه قارشيديرلار و قويمورلار آزربايجان بيرلشسين!

فرشي به يين يازيلارينداکي ايديعالار تک- تک اينجلنه جک اولورسا، به ي افندي نين اولوسال قورتولوش ساواشي نين ديشيندا اولدوغو اورتايا چيخاجاقدير. چونکو قورتولوش ساواشي سادجه زيندانا دوشمکله حاقليليق قازانماز. قورتولوش ساواشي اولوسون تاريخي و توپلومسال پوزيسيونونو، گئرچکلرینی دوغروجا ساپتاماقدان کئچر. ترس تقديرده آدام بير آوانتوريست و ماجراچي کيمي آلقيلانار. فرشي افندي نين سون يازيسي (کیملر بیرلیگیمیزه قارشی­دیلار؟! کیملر بؤلوجودولر؟! - عليرضا فرشي *) بونا آچيق اؤرنکدير.

فرشي به ي اورتاق اورفوقرافييادان دانيشير، آنجاق يازلاري نين لاتين اليفباسي واريانتيني ندنسه من گؤرمز اولدوم. کؤنول ايستردي کي، فرشي به ي، عؤمرونون بير قيسميني بيلگيلنمه يه حصر ائتسين کی، ۷-۶ ايل سونرا يازديقلاريندان پئشمان اولماسين.

اؤزآی اؤتگون
۲۷/۱۰/۲۰۱۰