قيرميزي رنگلي بايراق، ميللي اؤزه‌لليكله‌رده‌ن يوخسوندور
مئهران باهارلي
سون دؤنه‌مده بير نئچه اورتال (مئدييا) ييه‌سي، هؤرگوت (تشكيلات) و شخصييه‌ت طرفه‌فينده‌ن قامو اويونا "ميللي حره‌كه‌ت`ين سيمگه"سي دييه، قيرميزي بير بايراق-سيمگه‌نين منيمسه‌ندييي بيلديريلميشدير. من يئني اؤنه‌ريله‌ن قيرميزي بايراق-سيمگه‌ني، هم اؤنه‌ريلمه يؤنته‌مي آچيسيندان، هم ده منيمسه‌نه‌ن بايراق سيمگه‌نين اؤزو باخيميندان دوغرو بولمورام. بو گيريشيم چوخ ساييدا ايستيقلالچي كسيمي ايلك كز اورتاق بير اولاي چئوره‌سينده بير آرايا گتيره‌بيلميشدير. آنجاق بو اولوملو يؤنونه قارشين، بير چوخ آچيدان يانليش و ضره‌رلي بير گيريشيمدير.
الف-يؤنته‌م:
يئني قيرميزي بايراق-سيمگه‌نين اؤنه‌ريلمه يؤنته‌مي و اونو اؤنه‌ره‌نله‌رين اولايي اولدو بيتدييه گتيرمه‌له‌ري، بير سيراسينين بو اؤنه‌رييه قارشي چيخانلاري ايططيلاعات مامورو آدلانديرمالاري، .... سيياسي اخلاقا سيغمايان و آنتي دئموكراتيك داورانيشلاردير.
بوتون تشكيلاتلار بو اؤنه‌ريني دسته‌كله‌مه‌ميشدير: اؤنه‌ريله‌ن يئني آل بايراق-سيمگه‌ني دسته‌كله‌يه‌نله‌رده‌ن بير سيراسي، اونون بوتون تشكيلاتلارين دسته‌ييني قازانديغيني ايدديعا ائديرلهر. آنجاق بو ايدديعا گرچه‌كله‌ري يانسيتمير. قيرميزي بايراغي دسته‌كله‌يه‌نله‌رين گرچه‌ك يوزده‌له‌ريني تارتيشماق - ايران`ين دورومونو گؤز اؤنونده آلينجا- گرچه‌كچي دئييلدير. وار اولان تشكيلاتلارين چوخو بو بايراق-سيمگه‌ني منيمسه‌سه ايدي بيله، گينه ده دوروم ده‌ييشمه‌زدي و بو گيريشيمين دوغرو اولدوغونو قانيتلامازدي. يانليش بير دوشونجه و اينانج، هامي طرهفيندهن منيمسه‌نسه بيله، تنقيد ائديلمه‌ليدير.
ميلله‌ت بو اؤنه‌ريني منيمسه‌مه‌ميشدير: آل بايراق-سيمگه‌ني اؤنه‌ره‌نله‌رين ايدديعاسينا قارشين، شو آندا تورك ميلله‌تي كسينليكله سؤز قونوسو اولان بايراغي (نه‌ده آزهربايجان رئسپوبليكاسينين بايراغيني) دسته‌كله‌مه‌ميشدير و بو بايراق تورك ميلله‌تينين اوره‌يينده ده يئر آلمير. بوتون تشكيلاتلار قيرميزي بايراغي منيمسه‌سه‌يدي بيله، گونئي آزهربايجان`ين باشا باشيندا زنگان، باتي آزهربايجان، دوغو آزهربايجان، ارده‌بيل، مركه‌زي، همه‌دان، قزوين اوستانلاري و تئهران، گيلان، كوردوستان و كيرمانشاه اوستانلارينين توركله‌رله مسكون بؤلگه‌له‌رينده خالقين اؤنه‌ملي بير بؤلومو اونو منيمسه‌يينجه‌يه ده‌ك، گينه ده بو بايراغين ميلله‌ت طرهفيندهن منيمسه‌ديييني سؤيله‌مه‌ك اولمازدي. گونئيده و ايراندا آغير بير آسيميلاسييونا اوغراميش تورك خالقي، اويانيش مرحه‌له‌سينده‌دير و بؤيوك بير بؤلومو، اؤزونون بير ميللي قوروب اولدوغو بيلينجينه بيله وارماميشدير. تورك كيتله‌سي ان ياشامسال حاققي اولان توركجه تحصيل حاققي قونوسوندا بيله يئته‌رلي دويارليليغي قازاناماميشدير. آجي گرچه‌ك بودور. تيراختور ياريشمالاريندا قالديريلان قيرميزي بايراقلار، او ياريشمالارا قاتيلانلارلا سينيرليدير و كيتله‌سه‌ل.له‌شمه‌ميشدير. بير سيمگه بايراغي خالقين نئجه باغرينا باسماسيني گؤرمه‌ك اوچون توركييه`ده كورد خالقينين بايراقلارينداكي اوچ رنگه نئجه داورانديغيني گؤزله‌مله‌مه‌ك يارارلي اولار. اورادا سيرادان كورد خالقيندان هر گؤروشده اولان آيدينلارينا، ميلله‌ت مجليسينين كورد نوماينه‌نده‌له‌رينده‌ن نووروز بايرامي قوتلامارينا، فولكلور دانس قوروپلاريندان فوتبال ياريشمالاريندا، خييابان گؤسته‌ريله‌رينده‌ن سيياسي توپلانتيلاردا، .... هر يئرده بو اوچ رنگ واردير. بئله بير دورومدا "خالقيميز قيرميزي سيمگه‌ني باغرينا باسدي" كيمي سؤزله‌ر، گرچه‌كله‌رله ايلگيسيز و يالان ايدديعالاردير. بايراق و قيرميزي بايراق-سيمگه هله‌ليك نه تورك خالقي، نه ده گونئي آزهربايجان اهاليسي طرهفيندهن منيمسه‌نه‌ن بايراق و سمبول دئييلدير.
ميلله‌ت آدينا قرار وئرمه‌ك، ميلله‌ته ايهانه‌تدير: شوبهه‌سيز گونئي آزهربايجان و تورك خالقي اؤز ميللي بايراغينا قاووشمالي، بو دوغرولتودا تارتيشمالار ياپيلمالي، اؤنه‌ريله‌ر وئريلمه‌لي و بونلاردان بيري و يا بير نئچه‌سينين تركيبي سيياسي تشكيلاتلار آراسيندا ايجماع اولوشورسا و خالق اونو بو و يا هر هانسي باشقا بير نده‌نله دوغرودان يييه‌له‌نيرسه، گونئي آزهربايجان`ي تمثيل ائتمه‌ك اوچون منيمسه‌نمه‌ليدير. آنجاق بو سوره‌ج، بيزده يئنيجه باشلاميشدير. اورتادا هئچ بير شئي يوخكه‌ن و ميلله‌تين روحو بيله هئچ بير شئيده‌ن خبه‌ري اولماديغي حالدا، يئتگيسيزله‌رين ميلله‌ت آدينا قرار وئرمه‌له‌ري، "خالق قيرميزي بايراغي منيمسه دي و باغرينا باسدي" كيمي گرچه‌ك ديشي ايدديعالاردا بولونمالاري و اولايي بيتميش كيمي گؤسته‌رمه‌له‌ري، ميلله‌ته ايهانه‌ت و اينسانلاري آخماق يئرينه قويماقدير.
دئموكراتيك روح و آنلاييشدان يوخسون يؤنته‌م، سيياسي اخلاقا اويمايان داورانيش: بو بايراق آنجاق اولدوغو كيمي يعني آدي گئچه‌ن تشكيلاتلار طرهفيندهن و بو آماجلا اؤنه‌ريله‌ن بير بايراق-سيمگه دييه سونولمالي ايدي. آنجاق بو، ياپيلمادي. وورقولاماقدا يارار گؤروره‌م: منيم قيناديغيم شئي، تورك خالقي و گونئي آزهربايجان`ا ميللي بايراق اؤنه‌رمه اولايينين اؤزو دئييلدير، ترسينه من كسينليكله گونئي آزهربايجان`ا قوزئيده ن فرقلي، قاليجي بير ميللي بايراق ياراديلماسي گره كديييني ساوونورام. منيم قيناديغيم شئي، اؤنه‌ريله‌ن بايراقلارين آنتي دئموكراتيك بيچيمده سونولماسي، اولايي اولدو بيتدييه گتيرمه، يئتگيلي اولماديغي حالدا تورك خالقي و گونئي آزهربايجان يئرينه قرار وئرمه، بونلارا قارشي اولانلاري ايسه قارالاما و ايططيلاعات آدامي گؤسته‌رمه كيمي يؤنته‌مله‌ردير. بو اولاي بير يول داها تورك و گونئي آزهربايجان`ين مئدييا صاحيبله‌ري و سيياسي آكتيويستله‌رينده‌ن بير بؤلومونون اولايلارا نه دنلي گرچه‌كله‌رده‌ن قوپوق، دئموكراتيك روح و آنلاييشدان يوخسون ياناشديقلاريني گؤسته‌ردي.
ب-ايچه‌ريك:
قيرميزي بايراق، دوزگون و دئموكراتيك يوللارلا سونولسا ايدي ده، سياسي و كيمليك آچيلاريندان گينه ده يانليش، جيددييه‌تده‌ن اوزاق و ويزيونسوز بير گيريشيم ايدي. باشدا بونا گؤره كي ميلله‌تله‌شمه‌كده اولان تورك خالقي و دئوله‌تله‌شمه يولوندا يورويه‌ن گونئي آزهربايجان`ين سيمگه‌يه يوخ، بو ميلله‌تله‌شمه و دئوله‌تله‌شمه سوره‌جله‌ريني تمثيل ائده‌بيله‌جه‌ك، آزهربايجان جومهورييه‌تينده‌ن فرقلي اولان قاليجي بير ميللي بايراغا ائحتيياجي واردير.
ميللي بايراغين اورتايا چيخيشي، گونئي آزهربايجان دئوله‌تينين يارانماسيني يئيينله‌شديره‌ر: من گونئي آزهربايجان و تورك خالقيني تمثيل ائده‌جه‌ك ميللي بايراغين گونئي آزهربايجان دئوله‌تينين قورولماسيندان سونرانين ايشي اولدوغو دوشونجه‌سيني يانليش بولورام. ميللي حاقلارلا ايلگيلي اولان هر شئي، گونئيده ميللي دئوله‌تين قورولماسيندان آسيلي دئييلدير. اؤرنه‌يين توركجه‌نين ايراندا رسمي ديل ائديلمه‌سي، يا دا خالقينين ان آزيندان بله‌دييه‌له‌ر دوزئيينده اؤزونو يؤنه‌تمه قونوسو، ميللي دئوله‌ت يارانمادان دا گرچه‌كله‌شه‌بيله‌جه‌ك شئيله‌ردير. بونون كيمي، گونئيين اؤز ميللي بايراغينا قاووشماسي دا، حؤكمه‌ن دئوله‌ت قورولاندان سونرا گرچه‌كله‌شمه‌لي دئييلدير، اوندان اؤنجه ده الده ائديله‌بيلير. بو دورومدا گله‌جه‌كده قورولاجاق دئوله‌تين ايشي، ساده‌جه داها اؤنجه الده ائديله‌ن ميللي بايراغا (پارلئمان، رئفئراندوم، حؤكومه‌ت يارليغي، ... يؤنته‌مله‌ري ايله) رسمييه‌ت قازانديرماق اولاجاقدير. نئجه كي فيليسطين و فيليسطين خالقي دئوله‌تله‌شمه‌ده‌ن اؤنجه ده اؤز ميللي بايراغيني اورتايا چيخارميشدير. كورد خالقي و كوردوستان`ين بؤلومله‌ري ده عئيني يولو گئتميشله‌ردير. بيز ده ايستيثنا دئييليك و اؤز ميللي بايراغيميزا قاووشماق اوچون ميللي دئوله‌تيميزين قورولماسيني بكله‌مه‌مه‌ليييك. بيزي بونو ياپمايا مجبور قيلان نده‌نله‌رده‌ن بيري، ميللي بايراغين اورتايا چيخيشينين، بيزيم ميللي دئوله‌تيميزين اورتايا چيخيشينا كؤمه ك ائده‌بيله‌جه‌ييدير.
آزهربايجان رئسپوبليكاسيني بايراغي گونئي آزهربايجان`ين ميللي بايراغي دئييلدير: قيرميزي بايراق-سيمگه‌ني اؤنه‌ره‌نله‌رين آزهربايجان رئسپوبليكاسينين دئوله‌ت بايراغيني بوتون تورك خالقينين بايراغي دييه گؤسته‌رمه‌له‌ري، تكجه اونلارين دوشونجه‌سيدير. اونلار بو اينانجلاريني بئله تقديم ائتمه‌لي و بوتون گونئيليله‌ر آديندان قونوشماقدان ساخينماليديرلار. چونكو هامي بو دوشونجه‌ني پايلاشمير. اؤرنه‌يين من گونئي آزهربايجان و يا بوتؤو آزهربايجان`ين بايراغينين آزهربايجان رئسپوبليكاسي بايراغي اولماسي گره‌كدييينه اينانميرام. منجه گونئيين اؤزونه خاص تاريخي سوره‌جده اؤز ميللي بايراغيني اولوشدورماسي گره‌كير. قوزئي آزه‌ربايجاندا دالقالانان بايراق، بللي بير تاريخي سوره‌جين سونوندا قوزئيليله‌ر طرهفيندهن ياراديلميشدير. او بايراقدا خيريستييان چار روسيياسي سؤمورگه‌سينده‌ن قورتولما و موسه‌لمان عوثمانلي دئوله‌تي و اوردوسونون بو اوغوردا قاتقيسينين يانسيمالاري واردير. بو اوزده‌ن ده قوزئي آزهربايجان`ين ميللي بايراغي، يالنيز آزهربايجان رئسپوبليكاسينين ميللي بايراغيدير، گونئيين دئييلدير. اويسا گونئي آزهربايجان باشقا تاريخي بير سوره‌جده‌ن گئچمه‌كده‌دير. بيز موسه‌لمان فارسيستان سؤمورگه‌سينده‌ن قورتولما ساواشيمي وئرمه‌كده‌ييك و عوثمانلي كيمي ديش كؤمه‌كچيميز ده يوخدور، بيز آزهربايجان رئسپوبليكاسينين يارديميندان بيله يوخسونوق. تورك خالقي و بؤلونموش آزهربايجان`ين بيرلييي قوزئي`ين ميللي و دئوله‌ت بايراغيني گونئي`يه، يا دا گونئي`ين بايراغيني قوزئي`ه تحميل ائتمه‌كله ساغلانماز. بونلارين هر بيري، اؤته‌كينين اؤزونه مخصوص اولان تاريخي سوره‌جله‌رده اولوشدوردوغو ميللي بايراغا سايقي دويماليديرلار.
كوسووا-آرناووتلوق اؤرنه‌يينين وئردييي درس: من آزهربايجان رئسپوبليكاسي ميللي بايراغينين گونئي آزهربايجان`ين ميللي بايراغي اولماديغي، اولماماسي گره‌كدييي و اولابيلمه‌يه‌جه‌يينه اينانيرام. بئله بير شئيه بؤلگه‌سه‌ل و اولوسلار آراسي گوج مركه‌زله‌ري ده اولوملو باخماياجاقدير. نئجه كي عئيني گوجله‌ر، كوسووا`نين منيمسه‌دييي و آرناووتلوق بايراغي ايله عئيني اولان اؤز ميللي بايراغيني ده‌ييشديرمه‌يه مجبور ائتديله‌ر. بيليندييي كيمي كوسووا و آرناووتلوق آرناووتلاري بؤلونموش بير خالقديرلار. آرناووت خالقي و تورپاقلارينين بير بؤلومو باغيمسيز آرناووتلوق دئوله‌تي (آلبانيا) و اؤته‌كي بؤلومو صيربيستان`ا (كوسووا) داخيل ايدي. بو دوروم ايران`ا داخيل اولان گونئي آزهربايجان و باغيمسيز اولان قوزئي آزهربايجان`ين دورومونا بنزه‌يير. كوسووا آرناووتلارين سئچديكله‌ري ميللي بايراق ايلك باشدا آرناووتلوق دئوله‌تينين ميللي بايراغي ايله عئيني ايسه ده، سونوندا اونلار اؤز ميللي بايراقلارينين آرناووتلوق دئوله‌تي ميللي بايراغيندان فرقلي اولماسي گره‌كدييي سونوجونا وارديلار، داها دوغروسو بونو قبول ائتمه‌يه مجبور ائديلديله‌ر. بو دا بيزيم دوروما بنزه‌يير.
قيرميزي بايراق-سيمگه‌ني اؤنه‌ره‌نله‌رين چوخو، گونئي آزهربايجان`ين اؤز ميللي بايراغينا صاحيب اولماسي گره‌كديييني قبول ائتمييه‌نله‌ردير: قيرميزي بايراغي اؤنه‌ره‌نله‌رين اصيل حره‌كه‌ت نوقطه‌سي، گونئي آزهربايجان`ين ميللي بايراغينين آزهربايجان رئسپوبليكاسينين بايراغي اولدوغودور. بو اوزده‌ن ده اونلار گونئيه ميللي بايراق يوخ، گئچيجي بير سيمگه گه‌ركدييينه اينانيرلار. باشقا بير دئييشله گونئيه سيمگه منيمسه‌تمه، اونون ميللي بايراغيني دانماقلا ائش آنلامليدير. اؤنه آتيلان آل بايراغين گئچيجي بير سيمگه اولدوغو و گله‌جه‌كده قيراغا قويولوب و اون يئرينه گونئيده قوزئي آزهربايجان`ين بايراغينين منيمسه‌نه‌جه‌يي، بو بايراغي اؤنه‌ره‌نله‌رين چئشيتلي يازي و سؤيله‌شيله‌رينده ديله گتيريله‌ن بير تثبيتدير. بئله‌جه بو بايراغي اؤنه‌ره‌نله‌ر، گاموح`ون بايراق قونوسوندا ياپديغي يانليشليقلاري تكرارلاماقلا قالماييب، بير نئچه‌سيني اونا آرتيرميشديرلار. گاموح`ون اؤنه‌ردييي و باشلانقيجدا بللي بير قبول دا گؤره‌ن اؤز بايراغيني داها سونرالار تحميل ائتمه‌يه قالخيشماسي، يانليش ايدي. آنجاق گاموح`ون گونئي آزهربايجان اوچون - سيمگه دئييل- ميللي بير بايراق اؤنه‌رمه‌سي چوخ يئرينده بير گيريشم و بو بايراغين دا آزهربايجان رئسپوبليكاسي بايراغيندان فرقلي اولماسي گره‌كدييي گؤروشو، سون دره‌جه دوغرو بير گؤروشدو. يئني آل بايراق-سيمگه‌ني اؤنه‌ره‌نله‌رين چوخو ايسه گونئيه ميللي بير بايراق گره‌كدييني كؤكونده‌ن دانير و آزهربايجان رئسپوبليكاسينين دئوله‌ت بايراغيني گونئي آزهربايجان`ين دا ميللي بايراغي اولدوغونو ساوونورلار. بو گؤروشله‌ر كسينليكله يانليشدير.
بيرله‌شيك آزهربايجان`ين ميللي بايراغيني، گونئي آزهربايجان دئوله‌تي ايله آزهربايجان رئسپوبليكاسي اورتاقلاشا بليرله‌مه‌ليدير: بئله بير بايراق سئچيله‌جه‌كسه بو اورتاق بايراق، بوتون تورك خالقي و بوتون آزهربايجان`ين قاتيليمي ايله اورتايا چيخماليدير. آيريجا بو سورون، بوگونون سورونو دئييلدير. بيرله‌شيك آزهربايجان`ين اورتاق ميللي بايراغي مساله‌سي گونئي آزهربايجان دئوله‌تي قورولاندان سونرا دوشونوله‌جه‌ك بير قونودور. گونئي آزهربايجان دئوله‌تي يارانديقدان و اوفوقدا آزهربايجان رئسپوبليكاسي ايله بيرله‌شمه ايمكاني گرچه‌كده‌ن دوغدوقدان سونرادير كي اورتاق بايراغين نئجه اولماسي بو ايكي دئوله‌تين يئتگيلي اورقان و شخصييه‌تله‌ري آراسيندا و ايكي توپلومدا تارتيشمايا آچيلماليدير. بو قونونون بوگون تارتيشيلماسي بيله، گرچه‌ك اوستو بير تارتيشمادير. آيريجا بوتون تورك خالقي و بيرله‌شيك آزهربايجان`ين اورتاق ميللي بايراغي، هر ايكي بيريم و توپلومو قاپساياجاق اؤزه‌لليكله‌ري اؤزونده يانسيتماليدير. قوزئي آزهربايجان`ين دئوله‌ت بايراغي ايسه، بو قاپساييجي اؤزه‌لليكده‌ن يوخسوندور.
ميللي حره‌كه‌تين بايراغا ائحتيياجي يوخدور: من ميللي حره‌كه‌ته اؤزه‌ل بير بايراق گره‌كليلييي دوشونجه‌سيني، جيددييه‌تده‌ن اوزاق و يانليش بولورام. ميللي حره‌كه‌ت دييه بير قوروم، تشكيلات، حوقوقي و يا جوغرافي وارليق يوخدور. وار اولان، گونئي آزهربايجان و تورك ميلله‌تي و اونون ميللي حاقلاريني الده ائتمه اوغروندا چاليشان شخصله‌ر و تشكيلاتلاردير، شو آندا تمثيل ائديلمه‌يه ائحتيياجي اولان دا بونلاردير. گونئيده تورك خالقي طرهفيندهن قالديريلان بايراقلار، ميللي حره‌كه‌ت دئييل، گونئي آزهربايجان و تورك ميلله‌تي بايراغي دييه قالديريلمالي و بونلاري تمثيل ائتمه‌ليدير. گونئي آزه‌ربايجاندا گئده‌ن ميللي حاقلار اوغرونداكي حره‌كه‌ت ايسه، اؤزونو باشقا يول و آراجلارلار گؤسته‌ره‌بيله‌ر و گؤسته‌رمه‌ليدير ده. او جومله‌ده‌ن اوچ گؤي-قيرميزي-ياشيل رنگي اؤز سمبولو اولاراق منيمسه‌مه‌ك و يا "آذربايجان" كلمه‌سيني فارس يازيمي اساسيندا و "ذ" ايله دئييل، تورك ديلينه اويقون اولاراق "ز" ايله و ”آزربايجان" بيچيمينده يازماقلا. ايچينده بولوندوغوموز قوشوللاردا سيمگه، ميللي بايراغي اولمايان گونئي آزهربايجان و تورك خالقي اوچون اولاغان اوستو لوكس ساييلير.
رنگلي دئوريمله‌ر حاكيم ميلله‌تله‌رين دئموكراسي حره‌كه‌تله‌ريدير، محكوم ميلله‌تله‌رين ميللي قورتولوش حره‌كه‌تله‌ري دئييل: فارسلارين ياشيل حره‌كه‌تينين ياشيل سمبولو واردير دييه، بيزيم ده قيرميزي سمبولو منيمسه‌مه‌ميز گره‌كدييي سونوجونا وارماق يانليشدير. ياشيل حره‌كه‌ت، فارس خالقينين ميللي حره‌كه‌تي دئييلدير، داها اؤنجه‌ده‌ن اؤز دئوله‌تينه قاووشموش و ميللي بايراغي اولان، ميللي كيملييي و ميللي دئوله‌تي دونياجا تانينان حاكيم فارس خالقينين دئموكراسي حره‌كه‌تيدير. دولاييسي ايله اونلارين قالديرديغي ياشيل سيمگه بايراق، نه فارس ميللي قورتولوش حره‌كه‌تينين بايراغي، نه فارس ميلله‌تينين، نه فارسيستان`ين و نه ده فارس دئوله‌تينين بايراغي دئييلدير؛ ميللي بايراغي اولان حاكيم بير ميلله‌تين دئموكراسي حره‌كه‌تينين سيمگه‌سيدير. بيزيم ميلله‌تين حره‌كه‌تي ايسه، ميلله‌تله‌شمه‌كده اولان و اؤز ميللي دئوله‌تيني قورماق ايسته‌يه‌ن، وارليغي و ميللي كيملييي دونياجا بيلينمه‌يه‌ن و تانينمايان تورك خالقينين، ميللي قورتولوش حره‌كه‌تيدير؛ دئوله‌تي اولان حاكيم بير ميلله‌تين دئموكراسي موباريزه‌سي دئييلدير. تورك خالقي ميلله‌تله‌شمه‌كده و گونئي آزهربايجان دئوله‌تله‌شمه‌كده‌دير. ميلله‌تله‌شه‌ن و دئوله‌تله‌شه‌نه سيمگه‌ده‌ن چوخ داها اؤنه ملي اولان، اونون ميللي وارليغيني دونيايا تانيدابيله‌ن ميللي بايراقدير. دئوله‌تي اولسا دا اولماسا دا، دئوله تله شمه ده ن اؤنجه ده سونرا دا، تورك ميلله‌تي و گونئي آزهربايجان`ين- اؤزونو تمثيل ائده‌بيله‌جه‌ك ميللي بايراغا ائحتيياجي واردير.
خرميه و محمره خالق آياقلانمالارينداكي قيرميزي بايراقلار. قيرميزي بايراغي اؤنه‌ره‌نله‌ر، گئچميشده آزهربايجان`دا اؤرنه‌يين بايبه‌ك و باشچيليق ائتدييي "خرميه" حره‌كه‌تينده ده آل بايراقلارين قوللانيلديغيندان يارارلاناراق، اونو منيمسه‌تمه‌يه چاليشيرلار. حتتا بونلاردان بعضيله‌ري، قيرميزي و يا قيزيل رنگين آزهربايجان و تورك خالقين ابه‌دي سمبولو اولدوغونو ايدديعا ائديرلهر. بونلار بوش و اويدوروق ايدديعالاردير. قيرميزي و يا قيزيل رنگلي بايراقلار، قالديريلميش اولسالار بيله، هئچ واخت نه آزهربايجان`ين و نه ده تورك خالقينين سمبولو اولماميش؛ و خرميه حره‌كه‌تي و داها سونرالار بو حره‌كه‌ته قوشولانلارين قالديرديقلاري آل بايراقلار دا، آزهربايجان`ا خاص اولان شئيله‌ر دئييلديرله‌ر. "خرميه" اورتادوغو و اؤزه‌لليكله بوگونكو ايران`ين هر بؤلگه‌سينده جره‌يان ائده‌ن، چوخونون اسكي ايرانيك اينانجلاريندا اولان يئرلي اهالينين ايسلام و عره‌ب حاكيمييه‌تينه قارشي بير ديره‌نيش حره‌كه‌تي ايدي. گله‌جه‌ك يوز ايلله‌رده باشدا غولات (غلات) اولماق اوزه‌ره هئتئرودوكس ايسلام مذهه‌بله‌ريني اولوشدوران خرميه آخيملارينين، تورك خالقي و آزهربايجان`ا اؤزگون اولان اؤنه‌ملي بير اؤزه‌لليكله‌ري يوخدور. خرميه آخيملاري داها سونرالار قيرميزي بايراقلاري قالديرمايا باشلاميشلاردير، آنجاق بو دا بوتون ايران و اورتا دوغودا منيمسه‌نه‌ن گنه‌ل بير اويقولاما ايدي و آزهربايجان`ا اؤزگو دئييلدي (بو اوزده‌ن ده بوندان سونرا بوتون اورتادوغودا "خرميه" حره‌كه‌تله‌ري "محمره" دييه آدلانديريلميشدير).
قيرميزي رنگلي بايراق، ميللي اؤزه‌لليكله‌رده‌ن يوخسوندور. ميللي سيمگه بير ميلله‌ت و يوردونون اؤزه‌لليكله‌ريني- گنه‌لده دانيلان، اونوتولان و يا وورقولانماق ايسته‌نه‌ن بير اؤزه‌للييي- اؤزونده يانسيتماليدير. نئجه كي فيليسطين خالقي و يوردو اوچون بو گؤره‌وي يئرينه گتيره‌ن، "مسجدالاقصي" سمبولودور. آنجاق قيرميزي بايراقدا تورك خالقي و گونئي آزهربايجان`ين دانيلان و يا اونوتولان ميللي بير اؤزه‌للييي مئوجود دئييلدير. ذاته‌ن ايچه‌ريده تيراختور تاخيمي ماچلاريندا قالديريلان قيرميزي بايراقلار دا، نه تورك خالقي، نه گونئي آزهربايجان و نه ده تورك خالقينين ميللي حاقلاري اوغروندا وئردييي ساواشيمين سمبولو اولاراق قالديريلماميشدير، يالنيز او آياق توپو تاخيمينين رنگي و سمبولو اولاراق قالديريلميشدير. آيريجا ياخين گئچميشده دونيانين فرقلي بؤلگه‌له‌رينده قالديريلان قيرميزي سيمگه، گنه‌لده ميللي يوخ، ترسينه ميلل اولماماغي، اؤرنه‌يين انتئرناسيوناليسمي تمثيل ائتمه‌ك اوچون قالديريلميشدير. دوروم بئله ايكه‌ن، بير سيرا ديشاريدا اولان هؤرگوتله‌ر طرهفيندهن آياق توپو ياريشمالاريندا قالديريلان قيرميزي رنگلي بايراغا ميللي اؤزه‌لليكله‌ر يوكله‌نمه‌سي و داها سونرا دا اونو ميللي حره‌كه‌تين حتتا گونئي آزهربايجان`ين بايراغي دييه سونمالاري جيددييه‌تده‌ن سون دره‌جه اوزاقدير.
سمبول بايراق چليشگيليدير. من گونئي آزهربايجان و تورك خالقينين عئيني آندا سمبول بايراق (تك رنگلي) و ميللي بايراغا ائحتيياجي اولدوغونو دوشونموره‌م. اساسه‌ن اورتادوغودا ميللي حره‌كه‌تله‌رين تمثيل ائتديكله‌ري ميلله‌تين و وطه‌نله‌رينين آيري آيري بايراق-بايراق و سمبول-بايراقلاري يوخدور. نئجه كي فيليسطين خالقينين، فيليسطينين و فيليسطين ديره‌نيش حره‌كه‌تينين تك بير بايراغي واردير. او دا بايراقدير، سمبول دئييلدير. بيزيم ده بئله گره‌كسيز لوكوسله‌ره ائحتيياجيميز يوخدور.
بيرله‌شيك آزهربايجان`ين اورتاق سيمگه‌سي اولاراق اوچ گؤي-قيرميزي-ياشيل رنگلهري: من بوتون آزهربايجان`ي تمثيل ائده‌ن اورتاق سمبولون بليرله‌مه‌سي فيكرينه اولوملو باخيرام. بوگون بيزه هم كيمليك آچيسيندان و هم سيياسي موباريزه تاكتيكله‌ري باخيميندان ان گره‌كلي اولان شئيله‌رين باشيندا، بؤلونموش بير ميلله‌ت و بؤلونموش بير يورد اولدوغوموزو تثبيت ائتمه‌كدير. خالقيميزين بؤلونموشلويونو تثبيت ائديلمه‌ك بيزيم ميللي موباريزه‌ميزين تمه‌ل ايستيراتئژيله‌رينده‌ن اولماليدير. منجه ايكي آزهربايجان`ين بيرليييني وورقولايان ان اويقون سمبول، تك رنگ قيرميزي دئييل، اوچ گؤي، قيرميزي و ياشيل رنگله‌ردير. بو رنگله‌ر، مودئرن چاغدا قورولان ايلك آزهربايجان دئوله‌تينين بايراقلاريندا اولان رنگله‌ردير و بو اوزده‌ن ده آزهربايجان دئوله‌تچيليينين رمزي اولاراق قوللانيلابيله‌ر. نئجه كي بوتون كوردله‌رين منيمسه‌دييي اورتاق سمبول دا بايراق دئييلدير، قورولان ايلك كورد دئوله‌تينين بايراغيندا وار اولان سمبول اوچ رنگدير. بيزيم كورد خالقي ايله هئچ بير فرقيميز يوخدور. كوردوستان دؤرد اؤلكه آراسيندا بؤلونموشسه، آزهربايجان دا بئش اؤلكه آراسيندا بؤلونموشدور، آنجاق چوخوموزون بوندان خبه‌ريميز يوخدور (ايران، آزهربايجان رئسپوبليكاسي، توركييه، گورجوستان، داغيستان).
يئني سيمگه، يئني بؤلونمه‌له‌ر دئمه‌كدير: قيزيل بايراق بيرله‌شمه مقصه‌دي ايله اؤنه سورولسه ده، پيراتيكده داها چوخ و داها درين بؤلونمه‌له‌ره هم گونئيين ايچينده و هم گونئي-قوزئي آراسيندا يول آچميشدير و آچاجاقدير. بيرينجي بؤلونمه ايستيقلالچيلار (اؤنه‌ريني دسته‌كله‌يه‌نله‌رين چوخو بو جرگه‌يه داخيلدير)، فئدراليستله‌ر و بونلارين ديشيندا قالانلار (اؤز گله‌جه‌ييني بليرله‌مه حاققيني ساوونانلار، .....) آراسيندا قيرميزي بايراق اولايينين تتيكله‌دييي آيريشما، جرگه له شمه و قارشي دورمالاردير. ايكينجي بؤلونمه، گونئي-قوزئي آيريشماسينين درينله‌شمه‌سيدير. اويسا بيزيم ائحتيياجيميز اولان شئي، فرقلي سيياسي آخيملار آراسيندا و ده قوزئي و گونئي آراسيندا دوغرودان بيرلييي وورقولايان، و دولايلي اولاراق بؤلونموشلويو تمثيل ائده‌بيله‌جه‌ك سمبوللاردير. بونو ياپمانين ان ائتگيلي و ان ساده يوللاريندان بيري ده، منجه اوچ ياشيل، قيرميزي و گؤي رنگله‌رين هر ايكي آزهربايجان`ين و سمبول رنگلهري دييه قوللانيلماسيدير (كوردله‌ر ده بنزه‌ر بير يولو منيمسه‌ميشله‌ردير). آنجاق قيرميزي بايراق –سيمگه‌نين منيمسه‌نمه‌سي، بو تاريخي فورصه تي قاچيرماق آنلامينا گلير. بيزيم خالق پارچالانميشدير و اونا بو اوچ رنگده‌ن باشقا بير سمبول سئچديرمه‌ك، اونو داها دا پارچالار و پارچالانميشليغيني قاليجيلاشديرار.
تاريخي حافيظه قولاي اولوشماز، خالقين تاريخي حافيظه‌سي ايله اويناماماق گره‌كير: گونئي آزهربايجان و تورك خالقينين بايراغينين رنگله‌رينده تاريخي سوره‌كليليك و داوام دا اؤنه‌مليدير. گؤي قيرميزي ياشيل رنگلهري، ايندييه ده‌ك گونئي اوچون اؤنه‌ريله‌ن بير چوخ بايراقدا، بايراقلارين طرحله‌رينده- بو طرحله‌ر فرقلي اولسا بيله- مئوجوددور. بو اوچ رنگي تورك خالقينين بيرليك سمبولو دييه، گونئي آزهربايجان شهه‌رله‌ري ديشيندا، تورك خالقينين ايران`ين گونئينده ياشايان بؤلومونده بيله قوللانانلار اولموشدور. اولوشان بو ده‌يه‌رلي تاريخي حافيظه‌ني ده‌ييشديرمه‌ك گره‌كسيز و سيياسي اولاراق سون دره‌جه هزينه‌ليدير. قوزئي و گونئيين بيرليينيني وورقولامانين زاماني اينديدير، بليرسيز گله‌جه‌كده دئييلدير.
posted by Mehran Baharlı @ 7:44 PM
0 comments
0 Comments:
Post a Comment
<< Home