گونئي آذربايجان’ا اؤنريلن ميللي سيمگه لرده اونودولان خوصوص؛ مشروعیت - قزيلباش بؤروسوي


بير سوره دير ميللي سيمگه ويا ميللي بايراق مسئله سي اينتئرنئت سيته لريميزده و مايل گروپلاريندا قيزغين شکيلده موباحيسه ائديلمکده دير. اينسانلار مووافيق و موخاليف نظرلريني بير شکيلده اورتا قويورلار. کيميسي سندلي بير شکيلده و موباحيسه شرطلرينه اويقون اولاراق. کيميسي هاي هويلا و قارا باسدي ايله (۱) . هرهالدا بورايا قدر هئر شئيين نورمال اولدوغونو دوشونه بيلريک. چوخونلوق قبول ائدير کي گونئي آذربايجان’ا بير بايراق ويا ان آزيندان ميللي حرکته بير سيمگه لازيمدير (۲) و بو سيمگه نين اوستونده موباحيسه گئدير. موباحيسه (بعضي موريدلر خاريج) غايت گؤزل دوام ائدير آما تأسوفله اوزرينده هئچ دورولمايان (وه يا چوخ آز دورولان) مسئله ” مشروعیت ” مسئله سيدير. ياني قيساجاسي بو کي طرحي اؤنره نين ده قبول ائدنين ده صلاحييتي اولماليدير کي قبول ائديلن بايراغين مشروعیتي اولسون. اؤزلليکله ده اؤنريلن طرحين بير تاريخي کئچميشي ويا ياريخي قايناغي اولمامليدير کي بير ميلتي تمسيل ائده بيلسين. آما تأسوفله سيته لره چيخان يازيلارين هارداسا هئچ بيرينده بو مسئله يه ايشاره اولونمايير حالبوکي بو مسئله ان عصاسي شرطله دن بيريدير. مشروعیتسيز بير طرح و يا اؤنري تبيي کي کوتلويلشمه شانسي و حاقينا صاحيب دئييلدير.


اونودماماق لازيم کي بايراق قبول ائتمک صلاحييتي هر شئيدن و هر کسدن اؤنجه ميلت طرفيندن سئچيلميش ميللي مجليسه آيددير. البتته کي بيزيم ميللي بايراغيميز حاقيندا دا سون سؤزو باغيمسيزليغيميزي ائلده ائتديکدن سونرا قورولان ميللي مجليسيميزه بوراخماق لازيمدير. کيمسه نين بوندا شوبهه سي اولماماليدير چونکو کيمسه ميلتين وليسي و وکيلي دئييلدير. ميلت اؤز وکيليني و تمسيلجيسيني اؤزو سئچر. آما بير طرفدن ده هر کسه آيدين اولدوغو کيمي بيز بو گون بئله بير ايمکانا صاحيب اولماديغيميز اوچون هابئله بير عومومي رئفراندوم و يا حتّی يورد ديشيندا بير عومومي قورولتاي ايمکاني اولماديغي اوچون اينديليک ان منطيقلي يول هر کسين ” ان مشروع ” طرحين اوستونده آنلاشماسي و بو طرحين ميللي مليس قورولانا قدر کئچيجي سيمگه اولاراق قبول ائديلمه سيدير. بو يوللا ميللي مجليسيميز قورولونجايا قدر ميلتيميزي و ميللي موجادله ميزي تمسيل ائده جک بير اورتاق سيمگه و کريتيک آنلاردا هرکه سي بيرلشديره جک اورتاق بير داياناغيميز اولاجاقدير.


بو نؤقته ده بو خوسوسو وورغولاماغي دا ضروري گؤرورم کي؛ ميللي موجادله ميزين ان تمل ايدئيالاريندان بيريسي ” بوتؤو آذربايجان ” آماليدير. گونئي آذربايجان’ين ايستيقلاليني ايسته ين هر کس کسينليکله واحيد آذربايجان ايدئياسيني دا قبول ائدير. و آيريجا گله جکده کي بوتؤو آذربايجان’ين بايراغي بو گون آذربايجان جومهورييتي نين دؤولت بايراغي اولان و ۱۹۱۸’ده ميلتيميزين يئتيشديرديگي بؤيوک رهبرلر محمد امين رسولزاده و فتحعلي خان خويلو طرفيندن قالديريلان بايراق اولاجاقدير. بو گون موباحيسه ائديلن سيمگه ايسه او گونه قدر کئچيجي سيمگه اولماليدير.


هرهالدا بو گون اورتادا بير نئچه بايراق واردير. گاموح تشکيلاتي نين بايراغي، گايپ تشکيلاتي نين بايراغي، بيرده ب.ا.ب تشکيلاتي طرفيندن يايينلانان ” مختصر آذربايجان تاريخي ” کيتابيندا يئر آلان و بو گون يئنيدن گوندمه گتيريلن بايراق طرحي. البتته گاهدان بعضي دوستلار اؤزلريندن بير طرحلر چيخارديب اؤنريرلر کي منجه بو ايشلره هئچ گرک يوخدور. زاتن اورتادا يئترينجه طرح و اؤنري واردير و بوندان ايضافه سي ساده جه ايش قاريشديرماق اولار. آيريجا بيزيم اصيل ميللي بايراغيميز زاتئن بلليدير و بو قبول ائديلن کئچيجي سيمگه اولاجاق اونون اوچون ده ايشي بو قدر بوروشدورماق لازيم دئييل. هابله بو عزيز دوستلار ديقت ائتمه ليديرلر کي اؤنريني وئرن مرجين ده صلاحييتي سون درجه اهممييتليدير. البتته کي هر هانسي آدي بير وطنداشين اورياتا آتديغي اؤنري يئترلي مشروعیته صاحيب اولماياجاقدير. چونکو نه اؤنري وئره نين بو ايشه صلاحييتي واردير نه ده اؤنريلن طرح بير تاريخي دير و مشروعیته ماليکدير.بای بک


منه بئله گلير کي بيز يوخاريدا قئيد ائتديگيم اوچ اؤنريدن بير دنه سيني سئچيب اونون اوستونده عومومي توافوق ائتمه ليگيک و هرکس ده بو سئچيمه قاتيلماليدير. بو ان دوغرو و ان منطيقلي يولدور. و تبيي کي بو آرادا ترجيه ائده جگيميز اؤنري ان مشروعیتلي طرح اولماليدير. منيم شخصي نظريمه سون گونلرده بير گروپ فعال طرفيندن گوندمه گتيريلن ” قارا آي اولدوزلو آذربايجان بايراغي ” اورتادا اولان ان مشرويتلي طرحدير.


چونکو:
آ) بو طرح ب.ا.ب تشکيلاتي نين يايينلاديغي بير کيتابدا چاپ اولموشدور. ب.ا.ب تشکيلاتي بوتؤو آذربايجان اوغرونا قورولان ايلک تشکيلات اولدوغو اوچون و بؤيوک موجاهيديميز رحمتليک ائلچي بئي طرفيندن قورولدوغو اوچون موجادله تاريخيميزده اؤزل بير يئره صاحيبدير.


ب) طرح آدي کئچن کيتابدا چاپ اولدوغو زامان رحمتلي ائلچي بئي اؤزو ساغ ايدي و ب.ا.ب تشکيلاتي نين باشيندا دوروردو. طبيعي اولاراق رحمتلي ائلچي بئي بير معنادا بو طرحين اورتايا آتيلماسي نين مسئولودور.


ج) بو طرحين ده ايچينده اولدوغو کيتاب چاپا گئتمه دن اؤنجه بئي’ه گؤستريلميش و بئي’ين فيکري سورولموشدور. بئي کيتابين ب.ا.ب آدينا چاپا گئتمه سينه موساعيده ائتميش و بايراق طرحي اوچون ده ” بو دا بير فيکيردير ” دئميشدير. ياني بئي بو طرحي فعلن دستکله مسه ده اونا قارشي چيخماييبدير و حتّی طرحين اؤزونون قوردوغو، باشيندا دوردوغو و چوخ اؤنم وئرديگي تشکيلات طرفيندن چاپ ائديلمه سينه موساعيده ائديبدير. منجه بو خوسوس چوخ اؤنمليدير.


د) طرح اورتايا قويولان ايلک طرحدير و داها دا اؤنمليسي بو گون گونئي آذربايجان ميللي حرکتي قاليبينده آکتيو اولان هئچ بير قورولوش طرفيندن دئييل بلکه آرتيق بير آنلامدا تاريخه قاريشميش آما عئيني حالدا حرکتيميزين اوستونده بؤيوک حاقي اولان و چوخ سايقي گؤرن بير قوروليش طرفيندن اؤنريليبدير. بو ندنله کيمسه نين بو طرحده بير ايديعاسي اولا بيلمز و طرح هرکسه آيددير.


ئ) طرح ميللي بايراغيميزا چوخ ياخيندير و اؤنري يازيسيندا دا يازيلديغي کيمي قارا آي اولدوز آشامالي اولاراق آغاراراق بوتؤو آذربايجان قورولدوغو زامان تامامئن ميللي بايراغيميزا دؤنوشه بيلر.


سون اولاراق بعضي دوستلارين ايراد توتدوغو قارا رنگه ايشاره ائتمک ايسته ييرم کي گويا قارا رنگ بايراغا ياراشماز ايميش. بو مسئله نين دوغرو و يا يانليشليغي بيزيم باخيش و يوروملاريميزا باغليدير. ياني بيز قارا رنگي بدبختليک و ياس رنگي کيمي دئييل بلکه ساده جه وطنيميزين کئچيجي ايشغالي نين علامتي اولارق گؤرسک کيمسه قالخيب بيزه ” يوخ ايللا دا بو بدبختليک رنگيدير ” دئميه جک کي! ميثال اوچون آلمان اؤلکه سي نين بايراغي اوچ رنگدن تشکيل اولور کي ان اوستده کي رنگ قارادير. ايندييه قدر هئچ ائشيتدينيز مي کي کيمسه آلمانلارا ” سيزين بايراغينيزدا قارا رنگي وار اونون اوچون سيز بدبخت آداملارسينيز ” دئسين؟! ياني بيريسي بئله دوشونسه چوخ گولمه لي اولماز مي؟ بو گون آلمانلار دونيانين ان گولجو و زنگين ميلتلريندن بيريدير باخماياراق کي بايراقلاريندا قارا رنگي وار. دئمک کي ايشارتلر و علامتلري بيز نئجه گؤرمک ايستسک اونلار دا بيزه ائله او معناني داشيياجاقلار.بای بک


من کيچيک بير ميللي فعال کيمي بوتون تشکيلاتلاريميز، قوروم و قورولوشلاريميزي بيرلييه دعوت ائديب بو اوچ طرحين بيري نين اوستونده توافوق ائتمه يه چاغيريرام. منيم دستک وئرديگيم اؤنري ايسه ” قارا آي اولدوزلو آذربايجان بايراغي ” دير. آما بونو دا بيلديريرم کي اکثريت نيي قبول ائدرسه من ده طبيعي اولاراق اونا سايغي گؤستره جگم.


سايغيلاريملا؛
۱۹/۰۷/۲۰۰۸


[۱] بو آرادا کئچن گون گروپلارا آتيلان بير ای-ميلده بيريسي نين بير نئچه باشقا اينساني هئچ بير سند و دليل گؤسترمه دن جاسوس و اطلاعات آدامي آدلانديرديغيني و ايما، ايشاره ايله او شخصلرين کيمليگيني بللي ائتمه يه چاليشديغيني گؤردوم. نه قدر اوزوجو!!! بعضي اينسانلاريميز موجادله نئجه وئريلر و مدني بير اينسان موخاليفلري نين قارشيسيندا نئجه دورار هله آنلاماييبلار!! اگر حاقيقتن بير خاينليک دورومو وار ايسه سندلرله او خائينلري ايفشا ائتمک لازيم يوخسا دا باشقالارينا بؤهتان آتماق سياسي اخلاقا يايارشماز!!


[۲] هر نه قدر هله بعضيلري ديرنسه لر کي ” يوخ، بو ايش آذربايجان’ين واحيدليگيني پوزور ” گنه ده چوخونلوق بو قرارا گليب کي گله جگين موستقيل گونئي آذربايجان’ينا قوزئي ايله بيرلشنه قدر بير بايراق لازيمدير و بو گون بين الخالق آرئنادا تحميل اولابيلمه ميز اوچون ده بو اولماليدير. يانيز بو خوسوسدا چوخ ديقتلي اولمق لازيم کي قبول ائديلن طرح اينديليک سادجه قوزئي آذربايجان’ين دؤولت بايراغي اولان ” بوتؤو آذربايجان بايراغي ” نا ان ياخين طرح اولسون.