Tuesday, July 22, 2008



بير ميلتين ايکي بايراغي …! - اولوس


گونئي آذربايجان ميللي بايراق سئچيمي تارتيشمالاري نتيجه يه ياخينلاشديقجا ميللي – آزادليق حرکاتي ميزين اساس پروبلئملرينده ن بيري و ان اساسلي سي يئني ده ن گونده مه گلمکده دير، قوزئي و گونئي موناسيبتلري و “واحيد آذربايجان” آنلاميني نين آچيقلانماسي. ميللي - آزادليق حرکاتي بطنينده “واحيد آذربايجان” دوشونجه سينين استراتژيک بير هدف اولماسي ياخود موباريزه تاکتيکالاري مجموعه سي آراسيندا يئرلشدي يي سئچيمي نين دوزگون ده يرلنديريلمه سي ميللي – آزادليق حرکاتي منسوبلاري و قوروملارينين اساس وظيفه لرينده ن بيري حساب ائديلير. قوزئي آذربايجان جومهوريتي نين وارليغي ميللي – آزادليق حرکاتي ميزين اساس اوبيئکتيو اوزللي يي حساب ائديليرسه ده بير چوخ حاللاردا حرکات بطنينده چاشقين ليق لارين يارانماسي نده ني ده حساب ائديلمه لي دير.

اراضي و جمعيت اعتيباري ايله دورد ياخود بئش ده بيري حساب ائديله بيلن قوزئي آذربايجان اصلينده گونئي يين غرور منبعي اولاراق بير چوخ حاللاردا ايدئالي نادا چئوريله بيلير. آنجاق بورادا موستقيل بير دوولتين وارليغي و همين دوولتين دونيا ايجتيماعيتي طرفينده ن مووجود سرحددلرله قبول ائديلمه سيني ده نظره آلساق مووجود اولان چتين ليک لرين وارليغي ني دا قئيد ائده بيلرديک. قوزئي آذربايجانين موستقيليک تاريخينده ن سکسان (۸۰) ايل کئچمه سينه باخماياراق چاغداش دوورده موستقيل لي يينده ن نه آز نه چوخ دوز اون آلتي ايل کئچير. ميللي – آزادليق حرکاتي ميز ايسه “گئنج”-لييه دوغرو آدديملايان قوزئي آذربايجان جومهوريتي نين وارليغي ني و اونون ياشاميني تهلوکه يه سالا بيلن کيچيجيک بير حرکت ده ن بئله چکينمه لي دير. حرکات بطنينده ده بئله دير، ميللي آکتيويستلر و قوروملار دوشونجه فرقلرينه باخماياراق آذربايجان رسپوبليکاسي نين وارليغي و اونون دوزگون اينکيشافي ني ميللي - آزادليق حرکاتي ميزين آمالي کيمي قبول ائتميشلر.

“واحيد آذربايجان” دوشونجه سي ميللي ايدئولوگي يانين آيريلماز بير حيصصه سي اولاراق هدفلر مجموعه سي نين سون منزيل لرينده يئرلشميش دير. استراتژي هدفلر مجموعه سينده يئرلشه بيلن ” واحيد آذربايجان” آنلامي نين گئرچکلي يه دوغرو حرکتي اوزون تاريخي اينکيشاف پروسئسي کيمي درک ائديلمه لي دير. عکس حالدا “واحيد آذربايجان” دوشونجه سيني تاکتيکي بير مئتود سوييه سينه ائنديرمکله، ميللي حرکاتيميزلا برابر اون آلتي ايلليک موستقيل دوولتيميزين جيددي پروبلئملرله قارشيلاشا بيلمه سينه زمين ياراتميش اولارديق.

محض همين نوقطه ي نظرده ن “اوز موقدراتيني تعيين ائتمه” حوقوقو اوغروندا موباريزه ده بولونان گونئي آذربايجان حقيقتي “ايلک آدديم دا” و تکرار ائديريک “ايلک آدديم دا” اوز موستقيل لي ييني قورويوب ساخلاماغا مجبوردور. بونون قانوني، حقوقي و حقيقي اساسلاري دا مووجوددور. پارچالانميش بير ميللت استاتوسو قازانمادان اونجه، بيرلي يه دوغرو آتيلان هر بير آدديم، نتيجه اعتيباري ايله دونيا ايجتيماعيتي قارشي سيندا، بير طرفده ن قوزئي آذربايجان رسپوبليکاسيني جيددي پروبلئملرله قارشيلاشديرير، ديگر طرفده ن ميللي حرکاتي ميزين آرزو اولونماز دامغالارلا محدودلاشديريلماسينا سبب اولا بيلر.

ميللي آکتيويستلري ميز ياخود قوروم - تشکيلاتلارين بعضي لري نين “واحيد آذربايجان” دوشونجه سينه تاکتيکي ده ير وئرمه سينه و اوز فعاليت لريني همين “واحيد آذربايجان” آنلامي چرچيوه سينده تنظيمله سيني دموکراسي ده يرلرينه اساسن طبيعي حال قبول ائديريک، آنجاق “قوزئي” و “گونئي” آراسيندا مووجود اولان فرقلري نظره آلمادان واحيد بير سياستين يورودولمه سي ظننيميزجه استراتژيک بير سهو حساب ائديلمه لي دير. “بيرليک” اصلينده تام حوقوقلو بير سئچيم حساب ائديلمه لي دير و تام حوقوق الده ائديلمه ده ن اونجه “بيرليک”-ده ن يوخ “بيرلشديرمه”-ده ن سوز آچماق مومکوندور.

ايران آدلانديريلميش اولکه ده، ساوئت ايتتيفاقي نين مووجودلوغو دونه مينده سول حرکاتي نين بطنينده جريان ائده ن “هم راي ليک” (همبستگي) ياخود “باغلي ليق” (وابستگي) موباحيثه لرين تکرارينا يول وئرمه ده ن، آنلاييشلارين بير باشا دوزگون ده يرلنديرلمه سينه چاليشمالي و ميللي – آزادليق حرکاتي ميزين گونو – گونده ن آرتان ديناميک گوجونون اساس هدفه يونلنديريلمه سي حاقدا دوشونمه ييميزي گونوموزون رئالليغي حساب ائديريک.

گونئي آذربايجان ميللي – آزادليق حرکاتي نين، ايچ و ديش دا حياتا کئچيردي يي تدبير – آکسي يالاردا يالنيز قوزئي آذربايجانين “دوولت رمزي” کيمي قبول ائديلميش “ميللي بايراغي” حرکاتين سيموول ياخود سيمگه سي کيمي دالغالانيلماسي، قئيد ائتدي ييميز سببلر اوجباتيندان، دونيا ايجتيماعيتي طرفينده ن حرکاتين “سپاراتيسم” دامغاسي ايله قارشيلاشماسي ياخود دوولتچي لي يي قبول ائديلميش قوزئي آذربايجانين “داخيلي سياسي چاخناشمالاري”- نين ترکيب حيصصه سي کيمي قبول ائديله بيلر و هر ايکي حالدا حياتا کئچيريلميش آکسي يا - تدبيرلرين نتيجه سي قوزئي آذربايجان و گونئي ميللي – آزادليق حرکاتي نين عليهينه يونلنه بيلر.

محض همين حقيقتلرده ن دوغان ضرورتلري نظره آلاراق آذربايجان تورک ميللتينين پارچالانميش ميللت اولدوغونون ايفاده سي ني اوزويله داشي يا بيلن و کسکين ده ره جه ده فرقلنمه ين ايکي بايراغين مووجودلوغونا ضرورت دويولور. بئله بير شرائيطده گونئي آذربايجان ميللي - آزادليق حرکاتي نين حياتا کئچيردي يي تدبيرلرده ياخود قوزئي آذربايجانا خاص اولان موناسيبت و تدبيرلرده حتتا هر ايکي بايراغين پارالل اولاراق دالغالانماسي دونيا ايجتيماعيتي طرفينده ن طبيعي بير حال کيمي قبول ائديله بيلر.

گونئي آذربايجان ميللي – آزادليق حرکاتي نين ميللي بايراق سئچيم پروسئسينه اوتري بير نظر سالديقدا، سئچيمين ديالکتيکي بير طرزده “ديالوق”- لار اساسيندا آپاريلماسي نين شاهيدي اولوروق. بو ايسه اوزلويونده عوموم ميللي و طالع يوکلو قرارلارين قبول ائديلمه پروسئسينده جمعيتين بوتون قوروپلارينين ايشتيراکي نين مووجود شرائيط ايمکانلاري چرچيوه سينده تاميني دئمک دير. دفعه لرله قئيد ائديلدي يي کيمي ميللي – آزادليق حرکاتي ميز سيويل موباريزه يوللارينا اوستونلوک وئرمکله چاغداش دونيانين اوزه لليکلريني دائيما منيمسه سه يه رک، اوزه للشديرير.

همين ديالکتيکي پروسئس ياخود موناسيبتلر، حرکات بطنينده “مولکي” (Civil) و “آچيق”(Open) جمعيتين حقيقي معنادا فورمالاشديريلماسينا اساسلي بير طرزده تاثير گوسترير و نتيجه اعتيباري ايله جمعيتين هر بير عوضوونه ميللي – آزادليق حرکاتيندا “آپاريجي” استاتوسونو قازانديرير. قئيد ائديلنلري نظره آلساق، سادالانان موناسيبتلرده ن دوغان نتيجه ياخود نتيجه لرين هئچ بير شخص ياخود قوروم طرفينده ن اوزه للشديريلمه سي ياخود قانوني ليغي ني شوبهه آلتينا آلا بيلمه سي اوچون شرائيط يارانماماسي ني دا قئيد ائده بيلرديک.

“سيمووللار”، “سيمگه لر” و “ميللي بايراق” سئچيمي سانيلديغي کيمي تئوريک و پراتيک حرکتلرده ن ده آشاغي اونم داشي ميرلار. موباريزه آلانيندا جريان ائده ن موباريزه فورمالاري و تاکتيکالاري اصلينده حيسسي و منطيقي حرکتلرين بير – بيرلرينه چئوريلمه سي ايسه موشاييعت اولوناراق حرکاتين اينکيشاف تئمپي ني خاراکتئريزه ائدير. بير چوخ حاللاردا بير “سيموول” ياخود “سيمگه نين” جمعيته تاثيري سوز و ديالوقدان داها چوخ ائتگي سي واردير. محض بئله بير دوشونجه ايله “آند يئري” ساييلان ميللي بايراغين وارليغي نين اهميتي ني هئچ بير شخص ياخود قوروم اينکار ائده بيلمير.

قئيد ائديلنلري اساس توتاراق، ميللي - آزادليق حرکاتي ميزين کيچيک بير عوضوو کيمي، دموکراسي دوشونجه سينه اساسن وئريلن يالنيز بير سس حاققيمي قوللاناراق، “تبريز مرکزلي آذربايجان تورک دوشونجه سيستمينه” صاديق اولاراق، “اوجاق” رمزي ساييلا بيلن، “ايستي ليک” و “ايشيغي”خاطيرلادان ساري بويالي آي – اولدوزون اوچ رنگلي بايراغيميزدا يئر آلماسينا طرفدار اولدوغومو بيلديريرم. آنجاق چوخونلوغون وئردي يي قرارا سايغي ايله ياناشديغيمي دا قئيد ائديرم.

۲۱/۰۷/۲۰۰۸

0 Comments:

Post a Comment

<< Home