ميللي-آزادليق موباريزه ميز مودئرن ومدني خاراکترلي حساب ائديلير، آنجاق قانلي- قاداسيز ده دئييل…! بونو اونوتماياق…! - اولوس

دموکراتيک بير موحيط ده عوموميتله سوز آزادليغي نا تام معناسي ايله اينانديغينميز اوچون، اينسانلارين دوشونجه لرينه حورمتله ياناشيريق. آنجاق دموکراسي يا يا خاص اولان آنلاييشلارين تحريفي ايله گيزله ديلميش و گيزلي ماراق ياخود سياستلري ايره لي آپارانلارا قارشي چوخدا مرحمتلي اولا بيلمه ريک و اولماياجاييق دا. غيري- زوراکي بير موباريزه مئتودو (Non-Violent Action) سانيلديغي کيمي “قوربانليق قوزو” پسيخولوگي ياسي نين تبليغي دئمک دئييل دير و سيويل موباريزه جريان ائده ن بير موحيط ده ساده جه اولاراق جمعيتين اينساني ده يرلر اساسيندا فورمالاشماديريلماسيني اوزونده عکس ائتديرير.

محض همين نوقطه ي نظرده ن چاغداش تاريخ ده قئيده آلينان غيري – زوراکي موباريزه لرين جريان ائتدي يي موحيطلر عوموميتله قانلي – قاداسيز موحيطلر حساب ائديلميرلر. خارکئترلرينده ن آسيلي اولماياراق کونفلئکتلرين حللي غيري – زوراکي موباريزه لرين اساس آمالي حساب ائديلير. آنجاق کونفلئکتلر اوزلري اوبيئکتيو بير حقيقت اولدوقلاري اوچون چوخ آلانلي اينکيشاف پروسئسلرينه ده ماليک ديرلر. کونفلئکتلرين اينکيشاف يونو ايسه تکجه غيري – زوراکي موباريزه ايشتيراکچي لاريندان آسيلي دئييلدير و چوخ سايلي عاميللر مجموعه سي اونا تاثير ائده بيلر. خوصوصي ايله حاکيميت لرين خاراکئتئرينده ن آسيلي اولارق موحاريبه لار، اينقيلابلار ياخود حتتا پارتيزان دويوشولرينين کونفلئکتلرده ن دوغولا بيلمه مه سيني هئچ کس ضمانت ائده بيلمير.

غيري – زوراکي موباريزه دفعه لرله قئيد ائديلدي يي کيمي ساده جه اولاراق گوج آنلاييشي نين تعريفي نين ده ييشديريلمه سينه چاليشير و ايلکين اولاراق سيويل جمعيتين فورمالاشديرماسينا خيدمت ائدير. حقيقي معنا دا فورمالاشميش سيويل جمعيتين توتاليتار بير حاکيميت موناسيبتلري آلتيندا ياشايا بيلمه دي يي اوچون کونفلئکتلر اورتايا چيخير و کونفلئکتلرين حللي غيري – زوراکي بير موباريزه نين هدفينه چئوريلير. غيري – زوراکي موباريزه خريستيانليغين رحيم و مرحمتچيلي ييني ياخود ايسلامين تسليم اولونما سوزونده ن ده توره نمه ميش دير و ساده جه اولاراق اينسان جمعيتي نين ان دوزگون اينکيشاف پروسئسي حساب ائديلير.بای بک

“آزادليق قان طلب ائدير” جومله سينين کوکلري ني آراشديراندا ظننيميزجه “ائلچي بي موباريزه فلسفه سي” يوخ صمد نيکنام* جنابلاري نين واقتيله اينانديغي و اونون يولوندا موباريزه آلانينا آتيلميش ايدئولوژگي يا دا آرانمالي دير. هله ده دونيا سول حرکاتي نين اساس پروبلئملرينده ن بيري و ان اساسلي سي اولان “اينقيلاب” آنلاييشي موذاکيره لرين محورينده دورور و اينقيلاب آنلاييشينا موناسيبتلر حرکات داخيلي قوروپلاشمالارين اساس اوزه يي حساب ائديلير.

اگر اييرمي يانوار دا کوکلي بير صورتده سوسيال – سياسي قورولوشلارين ده ييشديريلمه سي ميللي – آزادليق حرکاتي نين اساس هدفي حساب ائديليرديسه، گنجه حاديثه لرين ده سيستم داخيلي اينکيشاف يونونون سئچيمي اساس موذاکيره آبيئکتيوي حساب ائديليردي. محض بو نوقطه ي نظرده ن ائلچي به يين “آزادليق قان طلب ائدير” سوزو دئييليبسه (ظننيميزجه بو آبسورت و معناسيزدير و بو حاقدا همين دوورده ميللي – آزادليق حرکاتي نين ليدئرلرينده ن آچيلقلانما گوزلنيلمه لي دير) سيستملر ده ييشمه سيني نظره آلساق چوخدا حاقسيز اولماماسيني ايدديعا ائده بيلرديک آنجاق گنجه قييامي نا قارشي حاکيميت ده ن تام معناسيله ايمتيناع ائتمه اوزلوينده غيري – زوراکي بير موباريزه نين ان دولغون نومونه سي حساب ائديلمه لي دير.

دموکراسي دوشونجه سينه اساسن عوموميتله چوخ دا به ينمه دي ييميز و حتتا نيفرت ائتدي ييميز شخصلرين عمللري ياخود سوزلرينه منطيقي طرزده ياناشماميز بير اصل حساب ائديلير. ابوالفضل ائلچي به يين کيملي يينده ن آسيلي اولماياراق “آذربايجان” و تکرار ائديريک “آذربايجان” مفهومو يئني ده ن واحيد بير آنلاييش کيمي اورتايا چيخدي. عصرين اوللرينده تاريخي شخصيتلر طرفينده ن فورمالاشميش دوشونجه لر، ساوئت قورولوشونون داغيلما پروسئسي باشلارکن محض ائلچي بي يين وارليغي ايله يئني ده ن سياست آرئناسينا آتيلدي. صمد نيکنام جنابلاري پارس راسيستلري نين اويدوردوقلاري “آران” و “آذربايجان” آيريليقلارينا اينانا بيلر و حتتا ايسلام حاکيميتي ني قبول ائده رک اونون قانوني اوپوزيسينا چئوريله بيلمه سي حاقدا دوشونه ده بيلر آنجاق حقيقت آرزولاريميزدان و دوشونجه لريميزده ن کسکين دره جه ده فرقله نير.بای بک

آذربايجان آنلامي واحيد بير سوسيال – سياسي سيستم دير. سيستمين واحيدلي يي تاريخين چئشيدلي آنلاريندا پوزولادا بيلر بو طبيعي حال اولاراق تکجه آذربايجانا خاص دئييل دير. تاريخين اينکيشاف پروسئسي و اونون ايستيقامتي تاريخي آنلاري دا يارادير. و بو تاريخي آنلار حقيقي معنادا تعيين ائديجي ساييلا بيلن دونوش نوقطه لري حساب ائديليرلر. محض همين نوقطه ي نظرده ن گونئي آذربايجانا بايراق ياخود سيمگه ياراتماق يوخ اونا خاص اولان بايراق ياخود سيمگه لري تارخين اونودولموش صحيفه لرينده آراماق لازيمي دير. ميللي – آزادليق حرکاتي ميزين بطنينده جريان ائده ن حاديثه لر کيمي. آذربايجانين گونئي ييني هيچ کس و هئچ بير قوروم موقددس آي اولدوزلو اوچ رنگلي بايراغيندان آيري سالا بيلمه يه جک…!