Tuesday, July 29, 2008

بایراق و سيمگه ایله باغلی گونتای گنجآلپ لا موصاحيبه



- بايراق مسئله سي ايله باغلي سيزين گؤروشونوز ندير؟

- بو حاقدا من " ايران اوردوسو، ميللي حرکت و بايراق مسئله سي" آدلي بير يازي يازديم. اورادا فيکيرلريمي آنلاتميشام. منيم فيکريمه گؤره هم بايراق، هم ده سيمگه مسئله سي زامانسيز اورتايا آتيلميش بير مسئله دير. زامانسيز و يانليش حسابلامالار اساسيندا اولدوغو اوچون بيزدن چوخ فارس شووينيزمينه خئيير وئرير.

- آنجاق گاموح بير بايراق چيخاريب و اونو گونئي آذربايجان بايراغي کيمي تانيدير.

- دوغرودور. چئهرقانلييا دَيَر وئرمکده يانيلميشيق. ميلت اولاراق يانيلميشيق. چئهرقانلي بيزيم يانيلديغيميزي ايثباتلادي. اونون بير چوخ ساحه لرده، او جومله دن بايراق مسئله سينده آوانتوريست داورانماسي ميللي اخلاقا سيغيشمايان داغيديجي عمللر ايدي. چئهرقانلي ايچريده اولدوغو زامان جسارتلي داورانميشدي. اونون بو جسارتي اوزرينه هر کس اونو تقدير ائتدي. او زامان من ده اونون حاققيندا خوش سؤزلر يازميشديم. آنجاق تجروبه گؤستردي کي، سادجه جسارت يئترلي دئييلميش، اخلاق و بيلگي مسئله سي ده چوخ اؤنملي ايميش.

- چئهرقانلي اخلاقسيزمي يعني؟

- من اخلاق دئديکده اونو بسیط کندليلیک آنلاميندا نظرده توتمورام. فلسفي اخلاق حاققيندا دانيشيرام. گئنيش سوسيال داورانيشلاردا تولئرانس گؤسترمک و هر بير داورانيشين آرخاسينا اينسانین درين حئیثييتيني، گئنيش بيلگيني يوکله مک آنلاميندا اخلاق آنلاييشيني نظرده توتورام. بو آچيدان سؤيله يه جک اولسانيز، بلي چئهرقانلي به يده ميللي اخلاق ضعیفدیر. خاطیرلاییرسینیزسا، او نَقدر داخیلده ایدی، میللت اونا درین سایقی گؤستریردی. او، میللی کیملیگین، میللی موباریزه نین رمزینه دؤنه بیلردی. اوندان بکلنتی بو ایدی. آنجاق چئهرقانلی بئی چوخ خیردا ایشلرله مشغول اولوب اؤزونو گؤزدن سالدی. اعتیبارینی ایتیردی. اعتیبار دا ائله شئیدیر کی، اونو ایتیردیگین زامان تکرار قازانماق اولماز. او باغيرتيلارين زاماني کئچميش آرتيق. بلکه ايرانين ايچينده اونون بير آنلامي اولا بيلردي، خاريجده اونا احتيياج يوخدور. چئهرقانلي بئي آوانتوريست داورانماق يئرينه غربده اؤزونو گليشديرمه لي و بيلگيلريني، داورانيشلاريني مودئرن اورتامدا گؤزدن کئچيرمه لي ايدي. بونو ائتمه ديگي اوچون اؤزونو بيتيردي. اؤز سايقينليغيني ايتيردي. شاعير دئميشکن، " قارانليق يوکلو کاروانلاردا يوخ اولدو." بئله اولماسي ياخشي اولمادي. چونکو بيزيم ايتيريله جک اينسانلاريميز اولماماليدير. آنجاق بيري زورلا اؤز کيمليگيني قارانليغا گؤمورسه اونو کيمسه انگلله يه بيلمز.

- دئييرسينيز کي، بايراق مسئله سي نين سوچلوسو چئهرقانليدير؟

- باشقا سوچلولار دا وار. آنجاق اساس سوچلو چئهرقانليدير. بو گون گونئي آذربايجاندا تجروبه سيز، دويغوسال بير گنج آدام چئهرقانلي نين و يا قوزئي آذربايجانين بايراغيني قالديرديغي اوچون توتوقلانيرسا، گئرچکدن چوخ آجي بير دورومدور. من بونون آدينا ميللي موباريزه دئميرم. تجروبه سيز گنجلري بوشونا شووينيزمين زيندانينا سوخماقدير بو. بعضن سيته لرده " قوزئي آذربايجانين بايراغي فيلان شهرده دالغالاندي" و يا "چئهرقانلي نين بايراغي بابک قالاسيندا و يا هانسيسا شهرده دالغالاندي." کيمي شابلون سؤزلر ائشيديريک. هر ايکيسي ده ميللي موباريزه يه ضيد اولان بير حرکتدير. بونا گؤره بير گنج آدامين حياتيني زيندانلاردا چوروتمه يه دَيمز. آنجاق بعضيلري بئله حساب ائديرلر کي، نه قدر چوخ آداملاريميز زيندانا دوشسه بو حرکت بير او قدر ده گوجلنر، دونيادا تانينار. يانليش فيکيردير. دونيادا تانينمادان اؤنجه ميلتين اؤز روحوندا، عاغليندا بير تانيملاما سورجي باشلاماليدير. اونا گؤره ده زامانسيز اولاراق هانسيسا بير بايراغي قالديرماق بيزه خئيير وئرمز. بو بايراقلارين اوردا- بوردا ياريم ساعات قالديريلماسي بيزيم هانسي پروبلئميميزي حلل ائده بيلر؟

- سيزين گونئيله علاقه نيز وارمي، اوراداکي هيجانلاري نئجه دَيَرلنديريسينيز؟

- بو گون هم گونئيده، هم قوزئيده منيم يازيلاريم اوخونور. هم ده چوخ اوخونور. البتته بو دا منيم اوزَريمه بؤيوک مسئوليت يوکله يير. مثلن منيم اوخوجولاريمين بير بئز پارچاسينا گؤره زيندانا دوشمه لريني ايستميرم. بو گنجلر زيندانا دوشمک يئرينه اوخويوب ساوادلانمالي و صاباح جمعيتده اؤز علمي-ايجتيماعي ستاتوسونو قورماليدير. ميللي کادرلارا دؤنوشمه ليديرلر. البتته من بيزيم توتولانلاري سوچلو گؤسترمک ايستميرم. يعني شووينيزم بيزيم اوزَريميزه جيدي باسقيلار تطبیق ائتمکده دير. من سادجه بير بايراغا گؤره توتوقلانماغي موباريزه حساب ائتميرم. بئله موباريزه اولماز. بيز اؤنجه دوشونجه لرده اؤزوموزه يئر ائتمه لي ييک. بو گون بيلگيلنمک و توپلومو بيلگيلنديرمک لازيمدير. گونئيين دَييشيک طبقه لري ايله ايرتيباطيم وار. ايرتيباطدا اولدوغوم هر کسه بو بايراق و سيمگه دارتيشمالاري نين اوغورسوز اولدوغونو سؤيله ييرم. چونکو ذاتن شووينيزم بيزيم ميللي گنجلريميزي زيندانا سالماق اوچون بهانه آختارير. بو بهانه ني ده اونون الينه وئرمه مک لازيمدير.

- ائلچي بئي قوزئي آذربايجان بايراغي نين بير گون گونئيده دالغالاناجاغيني دئميش آما...

- گونئي آذربايجان قورتولدوقدان سونرا بير چوخ اؤلکه نين بايراغي بيزيم باشکنديميزده دالغالاناجاق، او جومله دن قوزئي آذربايجانين دا بايراغي يقين کي، او اؤلکه نين سفيرليگي نين و کونسوللوقلاري نين اوزَرينده دالغالاناجاقدير. ذاتن بو گون ده دالغالانير.

- خئيير، ائلچي بئي دئميش کي، بو بايراق ايندي بوغچالاردادير و بير گون دالغالاناجاقدير.

- اوولا تاريخ موطلقا ائلچي بئيین دئديگي کيمي يورومز. تاريخين اؤز ديالئکتيکاسي وار. ائلچي بئي بو شکيلده آنلاماق يانليشدير. بو شکيلده آنلارساق او زامان اؤز عاغليميزي کوللانا بيلمريک. بيزيم ده عاغليميز وار. زامانا و اولايلارا گؤره اؤز عاغليميزدان ايستيفاده ائتمه لي ييک. دولاييسييلا هم ائلچي بئين هم ده ديگر بؤيوکلريميزين ده تجروبه لريندن يارارلانماق بيزه خئيير وئرر. شخصن من اؤز ویجدانیمدا ائلچی بئیله باغلی بیر وفا بورجومون وار اولدوغونو دوشونورم. آذربایجانین قورتولوشو یولوندا دوشونن هر کس اونون یولوندادیر. آيريجا، ائلچي بئي دئميش کي، بو بايراق بوغچالاردادير. بير زامان دالغالاناجاقميش. او بايراغين دالغالانما زاماني گلميشمي؟ گلمه ميش. يعني گونئی آذربايجان قورتولار، اؤز بايراغي اولار. سونرا دا قوزئيله بير اينتئقراسيون ايچريسينه گيرر، سونرا دا بوتؤو آذربايجاندا يا بو بايراق يا دا گونئيين تام اولسوچولوق چاغريشديران بايراغي دالغالانار. يا دا هر ايکي بايراق دالغالانار. يعني فئدئرال و يا کونفئدئرال بوتؤو آذربايجاندا هر ايکي طرفين بايراغي دالغالانار. هله او زامانا دا چوخ قالير. دئمه لي ائلچي بئين دئديگيني قبول ائتسک ده قوزئي آذربايجانين بايراغي هله اوزون زامان بوغچالاردا قالماليدير.

- بو سيمگه مسئله سينه نئجه باخيرسينيز؟ سانکي سئچيم يولو ايله ميللي حرکته سيمگه تعيين ائتميشلر.

- ياخشي باخميرام دوغروسو. چونکو بونو سئچيم يولو ايله تعيين ائديلميش سيمگه اولاراق قبول ائتمک اولماز. سئچيم هانسي اورتامدا کئچميش؟ اينتئرنئت يولو ايله، دئييلمي؟ بير آدام 100 ائ.مايل آدرئسي آچيب سس وئره بيلر. بو، اويونبازليقدان باشقا بير شئي دئييل. هم چوخ چوجوقجا دوشونولموش. آدام نه قدر گئري ذکالي اوماليدير کي، موستقيل بير دؤولتين، او دا بيزيم قوزئييميزين آي-اولدوزونو قارانليغا گؤمسون. قوزئيلي قارداشلاريميز بو آبطالجا دوشونولموش حرکته اعتيراضلاريني بيلديرمه ليديرلر. زورلا باغيمسيزليغيني قازانميش، آزادليغا چيخميش بير اؤلکه نين، وطنيمزين ديگر طرفي نين بايراغيني قارانليقلارا گؤممه يه کيمسه نين حاققي يوخدور. بو ايشي گؤرنلرين هاميسي شووينيزمين کؤله لريدير. يا بيله رکدن فارسين قوللوغونداديرلار کي، بو شکيلده خاينديرلر. يا دا بيلميرلر و جاهيلديرلر. جاهيللري آيدينلانماغا چاغيريريق. خاينلرله ده موباريزه آپاراجاغيق. شخصن من کيمسه يه ايذن وئرمرم ميلتيمين بايراغينداکي آيدينليق رمزلريني قارانليغا گؤمسونلر. ايمکانيم نه قدر ايذن وئرسه بونلارلا ساواشاجاغام. بوتون دونيا وطنيمين بايراغيني پارلاق آي-اولدوزلو گؤرمه يه آليشميش و اؤيله ده گؤره جکلر. داها دوغروسو اؤيله ده گؤستره جه ييک. دونيادا بو گون بيزيم حئیثيتيميزي و ميللي شرفيميزي تمثيل ائدن بير تک بايراغيميز وار. شرفي و حئیثيتي اولانلار بايراغيميزين لکه لنمه سينه ايذن وئرمه مه ليدير. منيم شرفسيزلرله ايشيم يوخدور. بايراغيميزين يئرلرده سورونمه سينه ايذن وئرمه يه جگيميز کيمي اونون گؤيلرده ده لکه لي گؤرونمه سينه ايذن وئرمه يه جه یيک. بو بايراق اوغرونا جانلاريني فدا ائتميش اينسانلار وار. ائرمنيستاندا اسيرليکدن آزاد اولموش بير عسگريميز دانيشير کي: ائرمنيلر اسير بير عسگريميزه دئييرلر کي، يئره سريلميش آذربايجان بايراغي نين اوزَرينه توپورسن سنه ايشکنجه وئرمريک. آذربايجانلي عسگر توپورمور. اونون قولاغيني کسيرلر. يئنه ده توپورمور. آدامي پارام-پارچا دوغراييرلار بايراغين اوستونه توپورمور و بو شکيلده اؤلور. بو بايراق اوغرونا بؤيله فداکارليقلار ائديلميشدير. کيمين جسارتي چاتار او آي-اولدوزو لکله سين. بيربئز پارچاسی لازيميندير "دفع اول! " گئت کندينه بير بئز پارچاسي تاپ. ميلتين بايراغي ايله نه ايشين وار؟ کيمسه حساب ائتمه سين بو بايراق صاحيبسيزدير. او بايراق بير امانتدير. اولولاريميزين، شهيدلريميزين، تاریخیمیزین بيزه امانتيدير. کیمینسه اونونلا آلای ائتمه سینه ایذن وئرمریک. کسینلیکله ایذن وئرمریک.

- اورتاسيندا قارالديلميش آي-اولدوز اولان بايراق کيمين اؤنريسيدير، بيليرسينيزمي؟

- بيليرم. آنکارادا ياشايير سئيف الدين آلتايلي. او، موختليف قايناقلاردان يارارلاناراق آرازاوغلو آدي ايله بير کيتاب يازدي. " موختصر آذربايجان تاريخي " آديندا. بو کيتاب علمي باخيمدان جيدي بير اثر ساييلماز. بو کيتابين اووَلينه اورتاسيندا آي-اولدوزو قارالميش بير بايراق يئرلشديرميشدي. گويا بو قاراليق گونئيين اسارتده اولماسيني رمزلشديرير و گونئي آزاد اولدوقدان سونرا آيدينلاناجاقميش! سئيف الدين آلتايلي بير تورک اولاراق گونئيين موباريزه سينه دستک وئره بيلر، بو، اونون ميللي بورجودور. آنجاق اونون بئله بير صلاحييتي يوخدور. بيز گونئيليلر اولاراق اونا بو صلاحييتي وئرمَريک. گونئي آذربايجانين يئتکيلي ميللي آيدينلاري ديشيندا کيمسه يه بو صلاحييتي وئرمريک. بيزيم اؤز عاغليميز يوخدورمو؟ ايران موحيطيني بيز ياخشي تانيياريق، يوخسا ايرانين تاريخي و سوسيولوژي موحيطي نين ديشيندا اولانلار ياخشي تانييار؟ ايندي سئيف الدين آلتايلی اؤز حدديني آشيب و بئله بير تشببوثده بولونوبسا اونا حدديني بيلديرمه لي ييک. نه اينکي حدديني آشماسي اوچون داها دا شرايط ياراتماليييق.

- سيز بئله حساب ائديرسينيز کي، هله بايراق چيخارمانين زاماني دئييل.

- بيز چوخ حسساس تاريخي مرحله دن کئچيريک. بير نئچه دفعه آياغا قالخيب و مغلوب ائديلميش، قانيميزا غلتان ائديلميشيک. اونا گؤره ده يوز اؤلچوب بير بيچمه لي ييک. بو مغلوبييتلرين اساس سببي شووينيزم اولسا دا بيزيم اؤزوموزده ده گوناه اولوبدور. مغلوبلار سوچلودورلار، یالنیز غالیب اولمالیسان. مغلوب اولورسانسا دئمک کی، یانلیش پلانلاما یاپمیشسان و سوچلوسان. بو دفعه مغلوب اولماماليييق. يعني مغلوبييته سبب اولاجاق داورانيشلار اؤز طرفيميزدن ائديلمه مه ليدير. اونا گؤره ده چوخ بيلگيلنمه لي، چوخ ايلگيلنمه لي ييک. بوتون احتيياجلاريميزي تلسمه دن تام زامانيندا گئرچکلشديرمه لي ييک. زامانسيز آتيلان آدديم اؤز طرفيميزدن مغلوبييتيميزه سبب اولا بيلر. بوتون گوجوموزله ميلتيميزي ميللي يؤنده آيدينلاتماغا سفربر اولمالييق. حققيقت بودور کي، ميلتيميزين ميللي-سياسي تجروبه سي و بيلگيسي چوخ آزدير. بو ساحه ده درينلشمه لي یيک. بونون اوچون گئنيش ايمکانلاريميز وار. اينتئرنئت سينيرلاري اورتادان قالديريب. گوناز ت و- ميز وار. بو تی - وی اؤزو-اؤزلوگونده بؤيوک اينقيلابدير. بو کانالدان لازيمي سَوييه ده ايستيفاده ائديلمير. اورادا گئنيش علمي، سياسي، سوسيولوژي موباحيثه لر اولماليدير. آنجاق بونو کيملر ائتمه ليدير؟ احمد اوبالي هر ايشي کي، ائده بيلمز. بعضي آداملار گونازي تنقيد ائدير. تنقيد ائتمه يه نه وار کي. تنقيد ائتمک يئرينه بير پروقرام حاضيرلاسينلار و تنقيد ائديلن عکسيکليکده اورتادان قالخسين. دئمک ايسته ييرم کي، قارشيميزدا قيسا بير فورصت وار. بو فورصتدن ايستيفاده ائديب گئنيش و درين آيدينلانما ايشلري گؤرمه ليیيک. چونکو هم رئژيمين ايچينده کي ايقتيدار داواسي، هم دونيانين ايران رئژيمي اوزَرينه باسقيسي مرکزي حؤکومتي بللي بير زاماندا ضعيفله ده جک. آرتيق او زامان آيدينلانما ايشلري گؤرمه يه فورصت اولماياجاق. او زامان ميلتيميز اؤلوم- ديريم ساواشينا قالخماليدير. باخ او تاريخي فورصتي قاچيرساق، آرتيق اساس ايشي گؤره بيلمه يه جه ييک. اونا گؤره ده قارشيميزداکي بو فورصتي ياخشي دَيَرلنديرمه ليیيک. بو بير موباريزه سورَجيدير. موباريزه پروسئسينده ميلتي حاضيرلاماق لازيمدير کي، قارشيميزدا دوغاجاق اولان او فورصتدن ايستيفاده ائده بيلسين. يعني هر کس بيلير کي، بو رئژيم سورعتله اينکيشاف ائدن دونيايلا اوزون زامان آياقلاشا بيلميه جک. تاريخ بو رئژيمي دئويره جک. آنجاق بيز حاضير اولماساق تاريخ بيزه قورتولوش فورصتيني تانيماياجاق. بيز حاضير اولماليييق کي، تاريخ بيزيمله ده حسابلاشسين. حاضير اولماق 4-5 گنج آدامين الينه بايراق وئرمک دئييلدير. بايراغيميز دا باخ حاققيندا دانيشديغيميز او تاريخي فورصتده زومرود قوشو کيمي ميللي سئودانين، ميللي موباريزه نين، ميللي بيرليگين، ميللي شهامتين ايچيندن دوغاجاق.

موصاحیبه نی آپاردی: بایسونقور

Bayaraq və simgə ilə bağlı

Güntay Gəncalpla müsahibə



- Bayraq məsələsi ilə bağlı sizin görüşünüz nədir?

- Bu haqda mən “İran ordusu, milli hərəkət və bayraq məsələsi” adlı bir yazı yazdim. Orada fikirlərimi anlatmışam. Mənim fikrimə görə həm bayraq, həm də simgə məsələsi zamansız ortaya atılmış bir məslədir. Zamansız və yanlış hesablamalar əsasında olduğu üçün bizdən çox fars şovinizminə xeyir verir.

- Ancaq GAMOH bir bayraq çıxarıb və onu Güney Azərbaycan bayrağı kimi tanıdır.

- Doğrudur. Çehrəqanlıya dəyər verməkdə yanılmışıq. Millət olaraq yanılmışıq. Çehrəqanlı bizim yanıldığımızı isbatladı. Onun bir çox sahələrdə, o cümlədən bayraq məsələsində avanturist davranması milli əxlaqa sığışmayan dağıdıcı əməllər idi. Çehrəqanlı içəridə olduğu zaman cəsarətli davranmışdı. Onun bu cəsarəti üzərinə hər kəs onu təqdir etdi. O zaman mən də onun haqqında xoş sözlər yazmışdım. Ancaq təcrübə göstərdi ki, sadəcə cəsarət yetərli deyilmiş, əxlaq və bilgi məsələsi də çox önəmli imiş.

- Çehrəqanlı əxlaqsızmı yəni?

- Mən əxlaq dedikdə onu bəsit kəndlilik anlamında nəzərdə tutmuram. Fəlsəfi əxlaq haqqında danışıram. Geniş sosial davranışlarda tolerans göstərmək və hər bir davranışın arxasına insanın dərin heysiyətini, geniş bilgini yükləmək anlamında əxlaq anlayışını nəzərdə tuturam. Bu açıdan söyləyəck olsanız, bəli Çehrəqanlı bəydə milli əxlaq zəifdir. Xatırlayırsınızsa o nə qədər daxildə idi, millət ona dərin sayqı göstərirdi. O, milli kimliyin rəmzinə dönə bilərdi, ondan bəklənti bu şəkildə idi, ancaq Çehrəqanlı bəy çox xırda işlərlərlə məşğul olub özünü gözdən saldı, etibarını itirdi. Etibar da elə şeydir ki, onu təkrar qazanmaq olmaz. O bağırtıların zamanı keçmiş artıq. Bəlkə İranın içində onun bir anlamı ola bilərdi, xaricdə ona ehtiyac yoxdur. Çehrəqanlı bəy avanturist davranmaq yerinə Qərbdə özünü gəlişdirməli və bilgilərini, davranışlarını modern ortamda gözdən keçirməli idi. Bunu etmədiyi üçün özünü bitirdi. Öz sayqınlığını itirdi. Şair demişkən, “Qaranlıq yüklü karvanlarda yox oldu.” Belə olması yaxşı olmadı. Çünkü bizim itiriləcək insanlarımız olmamalıdır. Ancaq biri zorla öz kimliyini qaranlığa gömürsə onu kimsə əngəlləyə bilməz.

- Deyirsiniz ki, bayraq məsələsinin suçlusu Çehrəqanlıdır?

- Başqa suçlular da var. Ancaq əsas suçlu Çehrəqanlıdır. Bu gün Güney Azərbaycanda təcrübəsiz, duyğusal bir gənc adam Çehrəqanlının və ya Quzey Azərbaycanın bayrağını qaldırdığı üçün tutuqlanırsa, gerçəkdən çox acı bir durumdur. Mən bunun adına milli mübarizə demirəm. Təcrübəsiz gəncləri boşuna şovinizmin zindanına soxmaqdır bu. Bəzən sitələrdə “Quzey Azərbaycanın bayrağı filan şəhərdə dalğalandı” və ya “Çehrəqanlının bayrağı babək qalasında və ya hansısa şəhərdə dalğalandı” kimi şablon sözlər eşidirik. Hər ikisi də milli mübarizəyə zidd olan bir hərəkətdir. Buna görə bir gənc adamın həyatını zindanlarda çürütməyə dəyməz. Ancaq bəziləri belə hesab edirlər ki, nə qədər çox adamlarımız zindana düşsə bu hərəkət bir o qədər də güclənər, dünyada tanınar. Yanlış fikirdir. Dünyada tanınmadan öncə millətin öz ruhunda, ağlında bir tanımlama sürəci başlamalıdır. Ona görə də zamansız olaraq hansısa bir bayrağı qaldırmaq bizə xeyir verməz. Bu bayraqların orda-burda yarım saat qaldırılması bizim hansı problemimizi həll edə bilər?

- Sizin Güneylə əlaqəniz varmı, oradakı həyəcanları necə dəyərləndirisiniz?

- Bu gün həm Güneydə, həm Quzeydə mənim yazılarım oxunur. Həm də çox oxunur. Əlbəttə bu da mənim üzərimə böyük məsuliyyət yükləyir. Məsələn mənim oxucularımın bir bez parçasına görə zindana düşmələrini istəmirəm. Bu gənclər zindana düşmək yerinə oxuyub savadlanmalı və sabah cəmiyyətdə öz elmi-ictimai statusunu qurmalıdır. Milli kadrlara dönüşməlidirlər. Əlbəttə mən bizim tutulanları suçlu göstərmək istəmirəm. Yəni şovinizm bizim üzərimizə ciddi basqılar tətbiq etməkdədir. Mən sadəcə bir bayrağa görə tutuqlanmağı mübarizə hesab etmirəm. Belə mübarizə olmaz. Biz öncə düşüncələrdə özümüzə yer etməliyik. Bu gün bilgilənmək və toplumu bilgiləndirmək lazımdır. Güneyin dəyişik təbəqələri ilə irtibatım var. İrtibatda olduğum hər kəsə bu bayraq və simgə dartışmalarının uğursuz olduğunu söyləyirəm. Çünkü zatən şovinizm bizim milli gənclərimizi zindana salmaq üçün bəhanə axtarır. Bu bəhanəni də onun əlinə verməmək lazımdır.

- Elçibəy Quzey Azərbaycan bayrağının bir gün Güneydə dalğalanacağını demiş amma...

- Güney Azərbaycan qurtulduqdan sonra bir çox ölkənin bayrağı bizim başkəndimizdə dalğalanacaq, o cümlədən Quzey Azərbaycanın da bayrağı yəqin ki, o ölkənin səfirliyinin və konsulluqlarının üzərində dalğalanacaqdır. Zatən bu gün də dalğalanır.

- Xeyir, Elçi bəy demiş ki, bu bayraq indi buğçalardadır və bir gün dalğalanacaqdır.

- Əvvəla tarix mütləqa Elçibəyin dediyi kimi yürüməz. Tarixin öz dialektikası var. Elçibəyi bu şəkildə anlamaq yanlışdır. Bu şəkildə anlarsaq o zaman öz ağlımızı kullana bilmərik. Bizim də ağlımız var. Zamana və olaylara görə öz ağlımızdan istifadə etməliyik. Dolayısıyla həm Elçibəyin həm də digər böyüklərimizin də təcrübələrindən yararlanmaq bizə xeyir verər. Şəxsən mən öz vicdanıma Elçibəylə bağlı bir vəfa borcunun var olduğunu hiss edirəm. Yurdumuzun qurtuluşu yolunda düçənən hər kəs Elçibəyin yolundadır. Ayrıca, Elçibəy demiş ki, bu bayraq buğçalardadır. Bir zaman dalğalanacaqmış. O bayrağın dalğalanma zamanı gəlmişmi? Gəlməmiş. Yəni Güney Azərbaycan qurtular, öz bayrağı olar. Sonra da Quzeylə bir inteqrasion içərisinə girər, sonra da Bütöv Azərbaycanda ya bu bayraq ya da Güneyin tam ulsuçuluq çağrışdıran bayrağı dalğalanar. Ya da hər iki bayraq dalğalanar. Yəni federal və ya konfederal Bütöv Azərbaycanda hər iki tərəfin bayrağı dalğalanar. Hələ o zamana da çox qalır. Deməli Elçibəyin dediyini qəbul etsək də Quzey Azərbaycanın bayrağı hələ uzun zaman buğçalarda qalmalıdır.

- Bu simgə məsələsinə necə baxırsınız? Sanki seçim yolu ilə Milli Hərəkətə simgə təyin etmişlər.

- Yaxşı baxmıram doğrusu. Çünkü bunu seçim yolu ilə təyin edilmiş simgə olaraq qəbul etmək olmaz. Seçim hansı ortamda keçmiş? İnternet yolu ilə, deyilmi? Bir adam 100 e.mail adresi açıb səs verə bilər. Bu, oyunbazlıqdan başqa bir şey deyil. Həm çox çocuqca düşünülmüş. Adam nə qədər geri zəkalı omalıdır ki, müstəqil bir dövlətin, o da bizim quzeyimizin ay-ulduzunu qaranlığa gömsün. Quzeyli qardaşlarımız bu abtalca düşünülmüş hərəkətə etirazlarını bildirməlidirlər. Zorla bağımsızlığını qazanmış, azadlığa çıxmış bir ölkənin, vətənimizin digər tərəfinin bayrağını qaranlıqlara gömməyə kimsənin haqqı yoxdur. Bu işi görənlərin hamısı şovinizmin kölələridir. Ya bilərəkdən farsın qulluğundadırlar ki, bu şəkildə xaindirlər. Ya da bilmirlər və cahildirlər. Cahilləri aydınlanmağa çağırırıq. Xainlərlə də mübarizə aparacağıq. Şəxsən mən kimsəyə izn vermərəm millətimin bayrağındakı aydınlıq rəmzlərini qaranlığa gömsünlər. İmkanım nə qədər izn versə bunlarla savaşacağam. Bütün dünya vətənimin bayrağını parlaq ay-ulduzlu görməyə alışmış və öylə də görəcəklər. Daha doğrusu öylə də göstərəcəyik. Dünyada bu gün bizim heysiyyətimizi və milli şərəfimizi təmsil edən bir tək bayrağımız var. Şərəfi və heysiyyəti olanlar bayrağımızın ləkələnməsinə izn verməməlidir. Mənim şərəfsizlərlə işim yoxdur. Bayrağımızın yerlərdə sürünməsinə izn verməyəcəyimiz kimi onun göylərdə də ləkəli görünməsinə izn verməyəcəyik. Bu bayraq uğruna canlarını fəda etmiş insanlar var. Ermənistanda əsirlikdən azad olmuş bir əsgərimiz danışır ki: Ermənilər əsir bir əsgərimizə deyirlər ki, yerə sərilmiş Azərbaycan bayrağının üzərinə tüpürsən sənə işkəncə vermərik. Azərbaycanlı əsgər tüpürmür. Bunun qulağını kəsirlər. Yenə də tüpürmür. Adamı param-parça doğrayırlar bayrağın üstünə tüpürmür və bu şəkildə ölür. Bu bayraq uğruna böylə fədakarlıqlar edilmişdir. Kimin cəsarəti çatar o ay-ulduzu ləkələsin. Bez parmçası lazımındır “dəf ol!” get kəndinə bir bez parçası tap. Millətin bayrağı ilə nə işin var? Kimsə hesab etməsin bu bayraq sahibsizdir. O bayraq bir əmanətdir. Ulularımızın, şəhidlərimizin, tariximizin bizə əmanətidir. Kiminsə onunla alay etməsinə izn vermərik. Kəsinliklə izn vermərik.

- Ortasında qaraldılmış ay-ulduz olan bayraq kimin önərisidir bilirsinizmi?

- Bilirəm. Ankarada yaşayır Seyfəddin Altaylı. O, müxtəlif qaynaqlardan yararlanaraq Arazoğlu adı ilə bir kitab yazdı. “Müxtəsər Azərbaycan tarixi” adında. Bu kitab elmi baxımdan ciddi bir əsər sayılmaz. Bu kitabın əvvəlinə ortasında ay-ulduzu qaralmış bir bayraq yerləşdirmişdi. Güya bu qaralıq Güneyin əsarətdə olmasını rəmzləşdirir və Güney azad olduqdan sonra aydınlanacaqmış! Seyfəddin Altaylı bir türk olaraq Güneyin mübarizəsinə dəstək verə bilər, bu, onun milli borcudur. Ancaq onun belə bir səlahiyəti yoxdur. Biz Güneylilər olaraq ona bu səlahiyəti vermərik. Güney Azərbaycanın yetkili milli aydınları dışında kimsəyə bu səlahiyəti vermərik. Bizim öz ağlımız yoxdurmu? İran mühitini biz yaxşı tanıyarıq, yoxsa İranın tarixi və sosioloji mühitinin dışında olanlar yaxşı tanıyar? İndi Seyfəddin Altaylı öz həddini aşıb və belə bir təşəbbüsdə bulunubsa ona həddini bildirməliyik. Nəinki həddini aşması üçün daha da şərait yaratmalıyıq.

- Siz belə hesab edirsiniz ki, hələ bayraq çıxarmanın zamanı deyil.

- Biz çox həssas tarixi mərhələdən keçirik. Bir neçə dəfə ayağa qalxıb və məğlub edilmiş, qanımıza qəltan edilmişik. Ona görə də yüz ölçüb bir biçməliyik. Bu məğlubiyətlərin əsas səbəbi şovinizm olsa da bizim özümüzdə də günah olubdur. Məğlublar suçludurlar, yalnız qalib olmalısan. Məğlub olursansa demək yanlış planlama yapmışsan. Bu dəfə məğlub olmamalıyıq. Yəni məğlubiyətə səbəb olacaq davranışlar öz tərəfimizdən edilməməlidir. Ona görə də çox bilgilənməli, çox ilgilənməliyik. Bütün ehtiyaclarımızı tələsmədən tam zamanında gerçəkləşdirməliyik. Zamansız atılan addım öz tərəfimizdən məğlubiyətimizə səbəb ola bilər. Bütün gücümüzlə millətimizi milli yöndə aydınlatmağa səfərbər olmalıyıq. Həqiqət budur ki, millətimizin milli-siyasi təcrübəsi və bilgisi çox azdır. Bu sahədə dərinləşməliyik. Bunun üçün geniş imkanlarımız var. İnternet sınırları ortadan qaldırıb. GUNAZ TV-miz var. Bu TV özü-özlüyündə böyük inqilabdır. Bu kanaldan lazımı səviyədə istifadə edilmir. Orada geniş elmi, siyasi, sosioloji mübahisələr olmalıdır. Ancaq bunu kimlər etməlidir? Əhməd Obalı hər işi ki, edə bilməz. Bəzi adamlar GUNAZ TV.ni tənqid edir. Tənqid etməyə nə var ki. Tənqid etmək yerinə bir proqram hazırlasınlar və tənqid edilən əksiklikdə ortadan qalxsın. Demək istəyirəm ki, qarşımızda qısa bir fürsət var. Bu fürsətdən istifadə edib geniş və dərin aydınlanma işləri görməliyik. Çünkü həm rejimin içindəki iqtidar davası, həm dünyanın İran rejimi üzərinə basqısı mərkəzi höküməti bəlli bir zamanda zəiflədəcək. Artıq o zaman aydınlanma işləri görməyə fürsət olmayacaq. O zaman millətimiz ölüm-dirim savaşına qalxmalıdır. Bax o tarixi fürsəti qaçırsaq, artıq əsas işi görə bilməyəcəyik. Ona görə də qarşımızdakı bu fürsəti yaxşı dəyərləndirməliyik. Bu bir mübarizə sürəcidir. Mübarizə prosesində milləti hazırlamaq lazımdır ki, qarşımızda doğacaq olan o fürsətdən istifadə edə bilsin. Yəni hər kəs bilir ki, bu rejim sürətlə inkişaf edən dünyayla uzun zaman ayaqlaşa bilməyəcək. Tarix bu rejimi devirəcək. Ancaq biz hazır olmasaq tarix bizə qurtuluş fürsətini tanımayacaq. Biz hazır olmalıyıq ki, tarix bizimlə də hesablaşsın. Hazır olmaq 4-5 gənc adamın əlinə bayraq vermək deyildir. Bayrağımız da bax haqqında danışdığımız o tarixi fürsətdə zümrüd quşu kimi milli sevdanın, milli mübarizənin, milli birliyin, milli şəhamətin içindən doğacaq.

Müsahibəni apardı: Baysonqur

0 Comments:

Post a Comment

<< Home