گونئی آذربایجانین بایراق مساله سینه بیر باخیش - آیدین تبریزلی

نئچه گون اونجه بای بک سیته سینده بیر یازی یاییلمیشدیر (۱) کی یئنی بیر بایراق اونری سی، بیرلیگه دوغرو گئتمک آماجیلا اورتایا قویولومشدور. بو یازینی اوخویاندا بیر سئوینج و اوموت منده یاراندی کی بیر یاخشی فیکیر ایله بو مساله اورتادان گوتوروله بیلر. بو دوزگون فیکیر بودور کی بایراغین شکیلین هئچ دئییشمدن یالنیز آی اولدوزون رنگین دئیشمک اولار. بو گرچکدن ان یاخشی و ان یارارلی فیکیردیر. نئیه کی آذربایجان بایراغینین اصلی عنصرلاری اونون شکیلی و اوچ اصلی رنگیدیر. آذربایجان بایراغیندا اوچ اصلی رنگ، گوی، قیرمیزی و یاشیل دیر و اونون اصلی شکیل عنصرلاری آی اولدوز دور.

ایندی ایسه آی اولدوزون رنگین دئیشمک ان کیچیک فرقدیر کی بو بایراقدا یاراتماق اولار کی اصلی بایراق ایله بیر اولماسین آنجاق ان آز فرقلی اولسون. منجه بو فیکیر صاحیبلرینه تبریک دئمک لازیمدیر کی بو مساله نین چوزوم یولونو ان دوزگون شکیلده اورتایا قویوبلار.

آنجاق اونلارین اونریسینده بو یئنی رنگ، «قارا» رنگ سئچیلیب دیر، بو دلیل ایله کی گونئی آذربایجان هله لیک یاسلی دیر. آما منجه بو رنگ ان یاخشی رنگ دئییل و بیر نئچه اشکالی وار. بیرینجی سی بودور کی بایراق بیر میللتین فخر ائدیلن سمبولو اولمالی دیر و قارا رنگ اگر یاسلی اولاماق نشانه سی اولورسا، اونو فخر ایله قالدیرماق اولماز! اوندان اونملی سی بودور کی اگر بیر گون بیز اوز میللی حاکمیتیمیزی الده ائده بیلسک داها یاس توتماغین معناسی اولماز و او زامان یئنه بایراق مساله سی اورتایا چیخاجاق و یئنه بو بایراغی دئیشمک لازم اولاجاق!

آما منیم اونریم بودور کی آی اولدوزون رنگی، «ساری» اولسون. آما «ساری» رنگین معناسی ندیر؟

گونئی همیشه «گونش»-ه باغلی دیر و گونشین علامتی اونون «ساری ایشیغی» دیر. قوزئی بایراغیندا «آغ» رنگین ده معناسی وار. قوزئی همیشه سویوق و «قار» ایله باغلی دیر و قارین علامتی اونون «آغ» رنگی دیر. بیر اوجا داغی، سهندی یا ساوالانی، یادا سالیر، قوزئی طرفینده «آغ رنگینده قار» اوتوروب و گونئی طرفینده «ساری یا چالان» توپراغین و اوت علف لرین رنگین یادا سالیر. «ساری» رنگ، آیری طرفدن ایشیق علامتی دیر و آی اولدوزون ایشیغین تمثیل ائدیر.

اومودوم وار کی بو اونری یه هامی مثبت نظر ایله باخسین. بو منیم یا بیر شخصین اونریسی دئییل. من بو فیکیری بای بک سیته سینده یاییلان چاغیریش دان آلمیشام و اونو اوخومادان اونجه بو فیکیر ذهنیمه چاتمامیشدی. اومودوم وار کی او چاغیریشی یازان دوستلاردا منیم یازیمی بیر تکمیل ائدیجی بیر اونری کیمی نظرده آلسینلار و یوخ کی بیر نفی ائدیجی بیر یازی. منجه بو اونرینین اصلی صاحیبلری همان دوستلاردیلار کی اونون دوزگون ایده سین اورتایا قویوبلار یعنی یالنیز آی اولدوزون رنگین دئییشمک و بایراغین هئچ بیر شکیلین دئیشمه مک. بو اونری نین اصلی فیکیری همان دوستلاریندی و یوخ منیم.

حورمتله،
آیدین تبریزلی
۱۴/۰۷/۲۰۰۸

(۱): [1] www.11008.bayb…

اونری بایراغین شکیلی:


http://www.11008.baybak.com/il_11008_say_473.azr