ميللي بيرليگه دوغرو !گونئي آذربايجان ميللي حرکتي نين سيمبولو علاوه بؤلوم؛ ايضاحلار و آچيقلامالار .

http://melliturk.blogfa.com/post-122.aspx
1ـ بوگون گونئي آذربايجان ميللي حرکتي نين بيرلشديريجي رول اوينايا بيله جک بير سيمبولا احتياجي واردير.



اؤتن ايللرده بعضي ميللي شخص، قروپ و تشکيلاتلاريميز گونئي آذربايجان ميللي حرکتي اوچون چئشيدلي بايراق طرحلري اؤنرميشلر. هر هانسي سبب اوزوندن تأسوفله بونلارين هئچ بيريسي ميللي ماهيت قازانا بيلمه ميش و ساده جه موعين بير تشکيلاتي تمثيل ائتميشلر. بو مسئله بعضاً کوتله ني چاش ـ باش سالميش ميللي فعاللار و تشکيلاتلارين آراسيندا ايختيلاف قايناغينا چئوريلميشدير. اصلينده بيرلشديريجي رولو اولان بايراق اؤزو داغيديجي اولموشدور! گونئي آذربايجان ميللي حرکتي نين ايچينده يئرلشن و ميللي مسئوليت حيسي داشييان هر بير شخص يا تشکيلات اولدوقجا اؤنملي و حياتي اولان بو پروبلئمه گؤز يوما بيلمز. بو پروبلئم زامان گئديشينده بؤيوک فاجيعه لر ده دوغورا بيلر. اونا گؤره ده بو پروبلئمين حلي هر بير کسي دوشوندورمه ليدير. بو گؤروشدن يولا چيخاراق گونئي آذربايجان ميللي حرکتيني واحيد بير جبهه کيمي گؤستره بيله جک بير سيمبولون واجيبليگي وورغولانماقدادير. ايختيلافلار ايچينده بوغولموش و ديدرگين گؤرولن هر هانسي ميللي حرکت جيدييه آلينماز و چابالاري نين بؤيوک قيسمي اثرسيز قالار.

يوخاريدا گلن نؤقطه يه باشقا آچيدان نظر سالماق ايسترديک. بلکه ده گونئي آذربايجان ميللي حرکتي فعاللاري نين چوخونلوغو 10 ايل بوندان اؤنجه ميللي سيمبول ضرورتيني بوگونکو قدر حيس ائتميرديلر. سون ايللرده گونئي آذربايجان ميللي حرکتي گئنيشلنديگي اوچون بير چوخ اولوسلارآراسي تشکيلات و مئدييالاردا اؤزونه لاييقينجه يئر آچميشدير. بورادا اؤزل اولاراق 2006-جي ايلي نين ماي آييندا گونئي آذربايجانين باشدا قهرمان تبريزين فارس شؤونيزمينه قارشي گؤسترديگي اهميتلي و تاريخي اعتيراضلي قالخينمالاري نين جيدي تاثيريندن سؤز آچماماق اولماز. اولو تبريزين قالخماسييلا آز زامان ايچريسينده اونلارلا گونئي آذربايجان شهري نين بير باشا فارس شؤونيزمي ايستيلاسينا عوصيان ائتمه سي گونئي آذربايجان ميللي مسئله سيني جيدي شکيلده دونيا چاپيندا عکس ائتديرميشدي. طبيعي کي، بؤيله بير دورومدا گونئي آذربايجان ميللي حرکتي نين اورتاق بير سيمبول ايله ايفاده اولونماماسي مسئله سينه اؤنجه کيلر کيمي لاقئيدليکله ياناشماق دوغرو اولا بيلمز. بوتون بونلارا گؤره آرتيق بوگون گونئي آذربايجان ميللي حرکتيني ايختيلافلاردان اوزاق و واحيد بير جبهه کيمي گؤسترن بير ميللي سيمبولون ضروريليگي دوشونولمکده دير.



2ـ گونئي آذربايجان ميللي حرکتينده ايلک دفعه اولاراق ميللي سيمبول اؤنريلمکده دير.



ميللي بايراق مؤوضوعسو هر ميللتين ان اؤنملي، تاريخي و استراتئژيک مؤوضوعلاريندان ساييلماقدادير. بلکه ده ايندييه دک چئشيدلي بايراق طرحلري اؤنريلمه سه يدي، بايراق يا سيمبول مؤوضوعسو بو قدر حساسيتله طرح اولونمازدي. مؤوضوعنون حساسليغي و دولاشيقليغيني گؤز اؤنونه آلاراق گونئي آذربايجان ميللي حرکتيني ايفاده ائدن اورتاق بير سيمبولون تعيينلشمه سي واجيبليگي اورتايا گلمکده دير. گونئي آذربايجان ميللي حرکتيني تمثيل ائدن ميللي سيمبول دوزنلي بير بيچيمده ايلک اولاراق اؤنريلمکده دير. بو سيمبولون هاميني بيرلشديره جگينه اينانيريق.



3ـ گونئي آذربايجانين ميللي بايراغي زامان گئديشينده ميللي فعاللار، قروپلار و تشکيلاتلارين چوخونلوغونون قبول ائتمه سي ايله تعيينلشه بيلر.



ميللي بايراق دؤولتلردن داها آرتيق ميللتلري تمثيل ائتمکده دير. ميللي موجاديله آپاران و دؤولت صاحيبي اولمايان ميللتلرين ميللي بايراغي اولا بيلر. گونئي آذربايجان ميللي حرکتي ايچينده چئشيدلي بايراق طرحلري وئريلديگي اوچون بونلارين هر هانکيسيني ميللي فعاللارين چوخونلوغونون راضيليق و تفاهومو اولمادان ميللي بايراق آدلانديرماسي مؤوضوعسو ميللي ايختيلافلارين يارانماسينا سبب اولاجاقدير. اونا گؤره ده گونئي آذربايجان ميللي بايراغي هر هانسي اينحيصارچي ايديعا و هاي ـ کويدن اوزاق گونئي آذربايجان ميللي حرکتي ايچينده يئرلشن فعاللار، قروپلار و تشکيلاتلارين هر هانسي طرحي قبوللوغو و توافوقو ايله تعيينلشمه ليدير. گونئي آذربايجان واختي ايله رسمي دؤولت و پارلامئنت صاحيبي اولان زامان رئفراندوم يا پارلامئنت سسينه اساساً چوخونلوغون قبول ائتديگي بايراق رسميلشيب و قانونيلشر. چوخ اؤنملي اولان ميللي بايراق تعيينلشمه سي مؤوضوعسونو يالنيز گونئي آذربايجان ايستيقلاليندان سونرايا ساخلاماق دوغرو دئييلدير و تکجه زامان گئديشينده ايختيلافلارين چوخاليب و درينلشمه سينه زمين ياراتماقدير!



4ـ اولوسلارآراسي شرطلره گؤره آذربايجان جومهوريتي نين بايراغي گونئي آذربايجاني تمثيل ائدنمز.



آذربايجانيميزين قوزئيينده تام موستقيل و رسمي دؤولت مؤوجوددور. آذربايجان جومهوريتي نين بايراغي اؤزل سياسي ـ حقوقي مؤوقع داشيماقدادير. بونونلا بئله گونئي آذربايجان توپلومونون آذربايجان جومهوريتي نين بايراغيني قالديرماسي اولوسلارآراسي موناسيبتلرده سياسي و حقوقي جهتدن قارماشيقليق گتيرر. گونوموزه دک گونئي آذربايجان اوچون بايراق طرحي اؤنريسي وئرنلرين هاميسي اصلينده قوزئي آذربايجان جومهوريتي بايراغي طرحيندن فرقلي بير طرحين اولماسي ضرورتيني دوشونرک عمل ائتميشلر.



5ـ گونئي آذربايجان ميللي حرکتي نين سيمبولو دئموکراتيک اورتامدا و هر هانسي اينحيصارچي ايديعادان اوزاق سونولماقدادير.



بوگون گونئي آذربايجان ميللي سيمبولو هئچ بير تشکيلات طرفيندن طرح اولونمور. بو حاقدا بوتون چاليشمالاري گونئي آذربايجان ميللي منافعي اوغروندا هئچ بير شخصي و تشکيلاتي چيخارلاري آرادا اولمادان بير قروپ موستقيل ميللي فعال ياپماقداديرلار. بورادا هئچ بير منفي رقابته زمين اولماديغي حالدا بو چاليشمالاري هر بير تشکيلاتا باغلاماق دا دوغرو دئييلدير. هر کس طرفيندن ايره لي سورولن هر هانسي ايديعانين ايچي بوش اولدوغونو وورغولايير و يالنيز بو چاليشمانين تخريبي دوغرولتوسوندا ديرلنديريريک. بو سيمبول نئچه آيين مدتينده بير چوخ ميللي فعاللارين خبردارليغي و اونلارلا گرچکلشن موذاکيره لرين نتيجه سينده سونولماقدادير. مسئله ايله باغلي بوتون منفي رقابتلردن اوزاق هر هانسي منم ـ منم ليگه يئر يوخدور. بو ايسه دئموکراسي اوصوللارينا اينانجيميزدان و اونا اساساً داورانماميزدان دوغموشدور.



6ـ بورادا هئچ بير يئني طرح اؤنريلمير.



بيزجه گونئي آذربايجان ميللي حرکتي نين بوگونکو سياسي دورومونو گؤز اؤنونه آلاراق سيمبول اوچون يئني بير طرحين اؤنريلمه سي اؤز ـ اؤزلوگونده يئني ايختيلافلار و آيريليقلارا سبب اولا بيلردي. محض اونا گؤره ده، يئني طرح اوزرينده دوشونولمه ميشدير. ايندييه دک گونئي آذربايجان اوچون اونلارجا طرح اؤنريلميشدير. سيمبول طرحي نين بو طرحلرين بيريسينه اوخشارليغي مؤوضوعسو منفي رقابتلره يول آچيب و ايختيلافلارا ندن اولا بيلردي. دئييلنلردن علاوه بيز اؤزوموزو بو مسئله ده حاقلي و صلاحيتلي ده گؤرمه ديک! 1999- دا بوتؤو آذربايجان بيرليگي(باب) تشکيلاتي طرفيندن ياييملانان "موختصر آذربايجان تاريخي" کيتابيندا درج اولونموش طرحين گونئي آذربايجان ميللي حرکتينه اويغون بير سيمبول اولاجاغينا اينانيريق. دئييلن طرح، قوزئي آذربايجان بايراغي ايله عئينيدير، آنجاق گونئي آذربايجانين هله ليک فارس شؤونيزمي نين اسارتينده اولدوغو اوچون طرحين کؤکسونده کي آي و سککيز بوجاقلي اولدوز ياس و کدر علامتي اولاراق قارا رنگده دير. گونئي آذربايجان ميللي حرکتي نين آماجي گونئي آذربايجاني اسارت و ايستيبداددان قورتارماق اؤزگورلوک و باغيمسيزليغا قوووشدورماقدير. يالنيز او گون ميللي سيمبولوموزون اوزريندن قارا رنگ گؤتوروله بيلر. بو تفسيره داياناراق تقديم اولونان سيمبول دوغرولوغو ايله گونئي آذربايجان ميللي حرکتيني عکس ائتديرمکده دير.



7ـ بوگون گونئي آذربايجان اسير دئييل مي؟! گونئي آذربايجان ميللتي اسارتده اولدوغو اوچون کدرده دئييل مي؟!



بعضيلري سيمبولون کؤکسونده کي قارا آي و اولدوزا توخوناراق قارا رنگين منفي آنلام داشيديغيني دئييرلر. بيزجه گونئي آذربايجان هله ليک فارس شؤونيزمي اسارتينده اولدوغو اوچون سيمبولداکي قارا رنگ تام اويغون گؤرولمکده دير. بوگون گونئي آذربايجان ميللتي اسير دئييل مي؟! ميليونلارجا تورک اؤز آناديليني اوخويوب و يازماسينا قادير دئييل، اوزون ايللردير کي، يئرآلتي و يئر اوستو ثروتلريميز تالان ائديلير، تورک آذربايجان کيمليگيميز تحقير و تحريف اولونور، ميللي ـ مدني ايرثيميز داغيديلير، ميللي شعور و اينانجا دولوب، ميللي ظولمه دؤزه نمه ين ميللي اؤزگورلوک ساواشينا قاتيلان اينسانلاريميز فارس شؤونيزمي نين سايسيز موصيبتلرينه توش گلير، ميللتيميزه سايسيز ـ حئسابسيز سيتم تطبيق اولونور؛ بو دورومو ياشايان ميللتين طالعي قارا دئييل مي؟! بو آجي و آجيناجاقلي دورومو ياشايان ميللت کدر ايچينده دئييل مي؟! البته کي، گونئي آذربايجان ميللي حرکتي تاريخي ضرورتدن دوغاراق فارس شؤونيزمي نين بوتون آنتي دئموکراتيک سياستلرينه سون قويماق اوچون هر گون گليشمکده دير و ميللتيميزين يئنيلمز ايراده سي ياخين گله جکده غلبه چالاجاقدير.

قئيده آلديغيميز مؤوضوعيا آيري آچيدان دا باخماق ايسترديک. قارا رنگ بير نئچه اؤلکه نين ميللي بايراغيندا مؤوجوددور. اؤرنک اوچون ميصير و افغانيستان اؤلکه لري نين بايراقلاريندا قارا رنگ ميصير و افغان ميللتلري نين سؤمورگه چيليک دؤورونده چکديکلري ظولمون نيشانه سي اولاراق قبول اولونوب و قالميشدير. بونلاردان علاوه وورغولاديغيميز کيمي گونئي آذربايجان ميللي حرکتي سيمبولونون کؤکسونده کي آي و اولدوزون قارا رنگده اولماسي اؤتريدير و هميشه ليك دئييلدير.



8ـ ميللي سيمبول هر کسيندير.



ميللي سيمبول گونئي آذربايجانليلارين هاميسينيندير. بو سيمبول گونئي آذربايجان ميللي حرکتي نين ايچينده يئرلشن ايستيبداد و فارس شؤونيزمينه قارشي موقدس ميللي موباريزه آپاران بوتؤو آذربايجان آماليني دوشونن، گونئي آذربايجان ايستيقلاليني ساوونان، گونئي آذربايجانين فئدرال سيستئمينده ايداره اولونماسيني ايسته ين و س. قروپلارين بيرلشديريجي فاکتورو اولا بيلر، دوشونجه سينده ييک.



9ـ تاريخي فورصتي ايتيرمه يک!



موستقيل ميللي فعاللار اولاراق گونئي آذربايجان ميللي حرکتي نين بوگونکو دوروموندا ميللتيميزه ايهانتلي حئساب اولونان نئچه بايراقليليق پروبلئمينه سون وئرمک اوچون بير چوخ تهلوکه و تهديدلري بوينوموزا گؤتوره رک عمل مئيدانينا وارديق. بير چوخ موستقيل ميللي فعال، قروپ و تشکيلاتلارلا موذاکيره لر اولوندو. ايمکانلاريميزين آزليغي و شراييطين چتينليگينه گؤره اولا بيلسين کي، بعضي فعال قروپلارلا موذاکيره گرچکلشه بيلمه دي. بورادا اونلاردان عوذور ديله مگي اؤزوموزه بورج بيليريک. مؤوضوعيا موثبت ياناشانلارين چوخونلوغونو نظرده توتاراق بو موراجيعتين حاضيرلانماسينا قرار وئريلميشدير. ايندييسه، بو تاريخي، ضروري، اؤنملي و استراتئژيک مسئله ده هاميني ميللي مسئوليت و تعهد داشيماغا چاغيرير و بو تاريخي فورصتي ايتيرمه مه يه سسله نيريک. نئچه بايراقليليق پروبلئمي حل اولونمازسا، صاباح تاريخين حؤکمو قارشيسيندا سؤزوموز نه اولاجاقدير؟!



10ـ گونئي آذربايجان ميللي فعاللاري، قروپ و تشکيلاتلاريندان ميللي بيرليک و برابرليک آدينا بو سيمبولون قبول اولونماسيني ريجا ائديريک.



گونئي آذربايجان ميللي حرکتي ايچريسينده يئرلشن و گونئي آذربايجانين سعادتي اوغروندا ميللي دوشمنلريميزه قارشي شرفلي موجاديله وئرن بوتون ميللي فعاللار، قروپلار و تشکيلاتلاريميزا مسئله ايله باغلي تام مسئوليت حيسي ايله ياناشمالاريني ايسته ييريک. ميللي سيمبول بوتون فعاللار و تشکيلاتلاريميزي بير ـ بيرينه ياخينلاشديراجاغينا ايچدن اينانير و بو اوزدن گونئي آذربايجان ميللي حرکتي نين گله جگيني دوشوننلردن مؤوضوعنون هر طرفلي حيمايه اولونماسيني ريجا ائديريک.