گؤنئي آذربايجان حرکاتي اؤچون سيمبول گرکلي مي دير؟ آنار ائلين

ده یرلی سوی داشلار;

سون گونلرده سؤزو گئده ن، گونئی آذربایجانیمیز اوچون بیر سیمگه نین یارانماسی قونوسو بیرچوخلاری کیمی منی ده دوشوندوردو.ائله بو ندنله اؤز گؤروشومو باشقالاری ایله پایلاشیم دئیه، بو یازینی سیزلره سونورام

گونئیین ، قوزئیده ن فرقلی سیمگه سی اولماغینا ضرورت وارمی؟

آذربایجان میللی حرکتی، دئموکراتیک اولدوغوایچین، فرقلی گؤروشلری سایغی ایله قارشیلاییر. آنجاق نظرده ن قاچیرمامالییق کی،میللت اولاراق واحید بیر آماجیمیز اولمادان،چئشیدلی قوروپلارا بؤلونمک، گوجوموزو داغیدیر و واحید بیر یومروق اولماغیمیزی انگللییه جکدیر.

اوزونتولرله میللی حرکتیمیزده یئنی یارانمیش تشکیلاتلارین بیر چوخو هر هانسی بیر گؤروله جه یی ضروری گؤرونن ایشده ن اؤترو یوخ، بلکه فرقلی سیاسی تحلیل لر اساسیندا قورولموشلار. گرکسیز چه ته لشمه لر،میللی بیر آماجین تعریف لنمه مه سینده ن ایره لی گلیر..یئنی یارانمیش بیر غئیر مونظمّ حرکتین موختلیف تعبیرلرله یوزولوب و بیر بیرینی تکمیل لشدیرمه ین فعالیت لره گیریشمه یی اونون گوجونو داغیدیب و ضعیف لندیره بیلر.

میللی حاقلاریمیزی الده ائتمک ایچین، میللی ایراده گرکلی دیر و میللی ایراده نی گوجه دؤندرمک ایچین اونون احتیاج لارین دوزگون دوشونوب و آرادان قالدیرماق چوخ اؤنملی دیر.

واحید بیر سیمگه ، موختلیف تشکیلاتلاریمیزین اورتاق نوقطه لرینین گؤسترجه سی اولاجاقدیر. آذربایجان میللتینین میللی و اینسانی حاقلارینی الده ائتمک ایچین چالیشان میللی فعال لارین چوخونلوغونون ایناندیقلاری ایلکه لر، بیر بیری ایله بیر چوخ واخت اوست اوسته توشور. بو اورتاقلیقلاری گؤسته ره بیله جک بیر سیمگه، تشکیلاتلاردان علاوه، عوموم میللتیمیزینده میللی کیملیک و غرورونون فورمالاشماسینا یاردیمجی اولاجاقدیر.

گونئیین نئجه بیر سیمگه سی اولمالیدیر؟

گونئیین سیمگه لی اولماغینا ضرورت وار دئیرکن، اونون نئجه بیر فورم دا اولماسی چوخ اؤنم داشیییر.
بو گونکو دونیـادا سیـاسـی اویونلارین، ائکـونـومینی نه درجه ده ائتگیلندیـردییی گؤز اؤنونده دیـر. اؤزگور اؤلکه لرین، ایقتیصادی دوروملارینی تهلوکه یه سالماماق ایچین، حاکیمییت لری طرفینده ن گؤتورولن آدیملاری آراشدیرارکن، اونلارین اساس ایلکه لرینین، میللی ماراقلار اولدوغونو گؤره بیله ریک.

هر بیر میللت چالیشیر اؤز ایسته یی و دونیا گؤروشونو اؤزونه سئچدییی سیمگه ده گؤسترسین. آذربایجان میللتینین خوشبخت لییی اوندادیر کی، اونون بیلگین لری ۹۰ ایل بوندان اؤنجه، شرق دونیاسینین ایلک دئموکراتیک جومهوریتینی قورموش و دئموکراتیک پرنسیپ لر اساسیندا اونو سیمگه لییه بیله جک بیر بایراق یوردوموزا تقدیم ائتمیشدیر. اوزونتولرله تورپاغیمیزین حسساس بیر زاماندا پارچالانماغی، میللتیمیزده ن، بو میللی غرورو، بوتؤولوکده یاشـاماق شانسینی آلمیـشدیـر. بو آجی اولای میللتیمیزین طالعـینده باش وئرمزدیرسـه، بو گون میللتیمیزین یاشادیغی دوروم ایندی کی دورومدان قات قات یاخشی اولا بیلردی.

نه یازیق کی کئچمیش طالعیمیـز زهرلندی. بو زه هرلنمیش کئچمیشی، آیدین و اوغورلو بیر گله جه یه دوغرو یؤنلتمک ایچین بو گون، گونئی ایله قوزئی، هر ایکیسی، میللتیمیزین بوتؤولویه گئده ن یولون هامارلامالیدیرلار. بو قونونون اولدوقجا اؤنملی اولدوغوایچین، چوخ درین ودوشونولموش شکیلده یولا چیخماغیمیز گره کلی دیر.

بو گونکو دونیامیزین قورولوشو سؤزده ده اولموش اولسا حوقوق اوزه رینده قورولور. گونئی آذربایجاندا، اینسانی توپلوم لارین بیر اؤیه سی اولاراق، اولوسلار آراسی قبول اولونموش حوقوق لارا سایغی لی اولمالیدیر. البته بو سایغی لی داورانیش میللی و معنوی حاقلاریمیزا گؤز یومماق آنلامین داشیمامالیدیر.

بوگون اؤلکه میزین بوتؤولویونو یئنی ده ن الده ائتمک ایچین گؤتوردویوموز آدیملار، اوره ییمیزجه اولماسادا، آماجیمیزا اوغراشماق ایچین گونئی و قوزئی ده، موختلیف مئتودلارلا ایره لی گئتمه لیدیر.آزادلیغا اوغراشماق ایچین وار اولان بوتون پوتانسییئل لرده ن یارارلانمالیییق. بو یارارلانماغین ان دوزگون یوللاریندان بیری حوقوقا اویغون حرکت ائتمه ییمیزدیر.

آذربایجان میللی حرکتی، گونو گونده ن گئنیشلنمکده دیر. هر بیر دوشونجه سل حرکتلر کیمی بیزیم میللی حرکتیمیزده، اؤز گلدییی یولا دؤنوب باخاراق اؤز یانلیش آدیملارین آراشدیریر و بیر داها بو یانلیش آدیملاری گؤتورمه مک ایچین اؤز آنلاییشیندا گره کن دوزلیشلر گتیرمه لیدیر. میللی قورتولوشوموزا، ایسته نیلن شراییطی ساغلایا بیلن دوزلیشلر، اولدوقجا گؤتوره جه ییمیز آدیملارین یانلیشلیقلاردان اوزاق اولماسی ایچین اؤنم لی دیر.

میللی حرکت اؤز حاق سسینی دونیانین قولاغینا چاتدیرماق ایچین سئچدییی ادبیاتادا دیققتلی اولمالیدیر. آذربایجان میللی حرکتی، آذربایجان وطنداش لیغینی اؤزو ایله داشییان اینسانلارین حقیقی دسته یینده ن علاوه ، باشقا میللتلرینده ان آزی حوقوقی دسته یینی قازانمالیدیر. آسیمیلاسیونا معروض قالیب و میللی حاقلاری تاپدالانمیش بیر میللت، قورتولوشو ایچین، یاردیما چاغیردیغی میللت لر و قوروملارا، بالقوّه بیر تهدید کیمی گؤرونمه مه لیدیر.
بوفاکتورلاری نظره آلاراق یولا چیخماغیمیز، منجه آدیملاریمیزین دوزگون آتیلماسینا چوخ یاردیمجی اولا بیلر.

سایغی لارلا
۰۸/۰۷/۲۰۰۸