ميللي سيمبول سئچمک اوچون، “بای بک”-دن ميللي دوشونجه لي سويداشلارا چاغيريش

هر ميلتين بير بايراغ و بير دئولتي اولماليدير.

بيلديگينيز کيمين، آذربايجان آدلانان اولکه سون يوز ايللرده ياد گوجلرين سيياستي سونوجو پارچالانيب. آذربايجانليلاري بو پارچالانماغا باش اَيديرمک اوچون، چئشيتلي کاناللاردان ايشه قونولان قوللار اولوب. بو قوللارين بيريسه بايراغ کاناليندا چاليشماقدادير.

آذربايجان ميللي فاللاري نين چوخونلوغو آذربايجانا ياراديلان بايراغي، کي گونوموزده قوزئي آذربايجان آدلانان موستقيل اولکه ده دالقالانماقدادير، ميللي بايراغ اولاراق تانيرلار.

او بايراغا سايقي و سئوگي دويان سويداشلاريميزين سايي چوخ دور، آما ملسف بو چوخونلوقون سسي چوخ آز ائشيديليبدير.

سياسي و هوقوقي باخيمدان، پارچالانميش آذربايجانين هر بير نوقتاسيندا او بايراغي قالديرماغ اولماز. بو، اولوسلار آراسي نورمالارادا ضيد اولا بيلير. هر بير دئولتين اؤز منافعينه گؤره، بللي سيياستلري واردير.

آذربايجان جومهوريسي سون ايللرده ب.م.ت و ديگر اولوسلاراراسي قوروملارا قاتيليبدير. تاريخه باخاراق، بو اولاي آذربايجان اوچون هم سئوينديريجي و هم اوزوجو آلينماقدادير. سئوينديريجيدير چونکو ان آزيندان آذربايجانين بير بؤلومو اؤز موستقيلليگين الدي ائديب. اوزوجودور چونکي بو ايستيقلاييت بير چوخ يئرده آذربايجانين ان بؤيوک حيصه سين، کي گونوموزده فارس حاکيمييتي ايشقاليندادير، بيله رک يا بيلميه رک، اونوتولماسينا ندن اولور.

آذربايجاني بوتؤو گؤرمک هر بير وطن سئور تورکون اؤرک آرزوسودور.

بيرليک و سونرا بوتؤولوک ايسته ين سويداشلاريميزين آسيي گئتديکجه آرتماقدادير. بونا ندن اولان بيلگي ياييلماسي و ميللي فاللارين داها آيدين و آچيق چاليشماسي اولوبدور.

بايراغ مسئله سي آذربايجان اوچون چوخ اؤنملي بير آشاماغدير. اون گؤره، ميللي فاللار بو آشاماغي آشماغ اوچون، بيرگه چاليشمالي اولاجاقلار. هر بير ميللي هرکاتين بير بايراغ اولماليدير.

آذربايجانين بؤيوک حيصه سي کي بو گون گونئي اولاراق آدي گئدير سون ايللرده گئنيش دييشيکليکلرله قارشيلاشيب. بونلاردان بيري ميللي دوشونجه نين ياييليب و گوجلنمه سيدير.

ميللي دوشونجه سي اولمايان بير هرکاتين قازانا بيلمه يهجگي هاميميزا آيديندير. اونا گؤره، ميللي دوچونجه نين اؤنملي اولدوغونو، اونون گوجلنديريلمه سين و قوروماسي اوچون ياپيلمالي اولان ايشلملرين يارارلي و گرکلي اولماسيني هاميميز بيليريک.

گونئي هرکاتي اوچون بير بايراغين اولماسي قاچينماز بير گرچکدير. آما، يوخاريدا ساييلان ندنلره گؤره، قوزئيده رسممي تانينان بايراغ گونئي اوچون آچيقليقدا ايشه آلينا بيلمز. گونئي اوچون يئني بير بايراغ گرکليدير. آما، اونوتماماغ لازيمدير کي ميللي بايراغيميز هر زامان و هر قوشول آلتيندا، بو گون قوزئيده دالقالانان بايراغ اولماليدير. يني، گونوموزده اگر گونئي اوچون بير بايراغ ياراناجاقديرسا، گئچيجي اولوب و گله جکده بيرلشمک زاماني اؤز گؤروين بيتيريب و يئرين ميللي بايراغيميزا وئرمه لي اولاجاقدير.

سون گونلرده بايراغ مسئله سي يئني سورونلار ياراتماغا باشلاييب. بو سورونلار بيزيم گوجوموزو آزالتماغلا بيرليکده، اؤز آراميزدا کدر و ساواش تؤرتمکله اؤزلرين بللنديريرلر.

ميللي هرکاتيميزي داغيتنا اؤزباشيناليغلارا سون وئريلمه ليدير و ميللي سورونلار ميللي فاللارين قاتقيسييلا چؤزولمه ليدير.

“بای بک” اولاراق بو قونودا ميللي فعاللاري بيرليکده بير ايجلاس گئچيرمگه چاغيريريق. بو توپلانتيدا هر تور دوشونجه و چئشيتلي قوروملارين اؤيه لري قاتيلاجاقلار. تشکيلات باشخانلاري، يئتکيلي سوروملولار و يالنيز چاليشان آيدينلاريميزين بو توپلانتييا قاتيلمالار شرطدير.

توپلانتيدا بايراغ مسئله سي قالديريلاجاق و قاتيلانلار هاميسي اؤز شخصي و تشکيلاتي گؤروشلرين آچيقلاياجاقلار.

وئريلن قرار، توپلانتيدا ايشتيراک ائدنلرين سسي و ايشتيراک ائده بيلمه يهن سويداشلارين يازيلي مکتوبلارين ساييسييلا آچيقلاناجاق. ياني کي، گيزلي-ساخلي اويونبازليقلاردان اوزاق اولان بير اورتامدا، هر کس وئريلن قرارا شاهيد اولاجاق.

بونا گؤره، “بای بک” پالتالک توپلانتيسين اؤنرير. باشقا مئدييالارا اولان اينامسيزليق نيدنيله، آلتئرناتيو بير توپلانتي ياراتماغ ايمکاني چوخ آز گؤرونور.

پالتالک واسيطه سيله بير چوخلو سويداشيميلز اؤز سؤزلرين و آچيقلامالارين ديله گتيره بيله جکدير. سانسور اولمادان، موخاليفلرين سسي کسيلمه دن و دوست-بازليق ائديلمه دن، هامي ائشيت اولاراق وئريلن قراردا يئر آلاجاقدير.

توپلانتيني قورماغ اوچون، بير چوخلو وطنسور آدمينلريميز وار. اونلاردان ايسته نيلسه، يوخ دئمه دن اللريندن گله ني ياپارلار. توپلانتيدا سسلر و يازيلار آرخيو اولونوب و گله جکده لازيم اولورسا قوللانيلاجاقدير.

وئريلن قرار بير ميللي ايستک اولاراق سونولاجاق. او قراردا سئچيلن بايراغ، گونئي هرکاتي اوچون گئچيجي اولان ميللي بايراغ عادي داشيمالي و آذربايجان آدينا چاليشان هر بير شخص يا تشکيلات اونا سايقي گؤسترمه لي اولاجاقدير.

بايراغ سئچيلديکدن سونرا، ساختا و تهميلي بايراغلارين هامي نين قوللانيلماسي ياساقلاناجاق و سئچيلن بايراغدان خاريج باشقا بايراغ قالديران شخصلر يا تشکيلاتلار ميللي محکمه يه وئريلمه لي اولاجاقلار.

ميللي محکمه دئييلنده، گله جک دئولتچيليگيميزده اولان هوقوقي قوروملاردان سؤز گئدير. يني خطاکار تشکيلاتلار گله جکده اؤزباشيناليغلاري و آنتي-ميللي ايشلرينه گؤره موحاکيمه ائديله جکلر. دئموکرات بير اورتامدا، داغيتيجي و آيريليق سالان ايشلملره يئر اولماماليدير.

آذربايجان، و اؤزلليکله ده گونئي بؤلمه سي بو گون او دورومدا دييلدير کي چئشيتلي تشکيلاتلارين يارانماسينا ايزين وئرسين. بو گون بيزيم اؤزگورلوگوموز اوچون يالنيز ميللي بيرليک گرکليدير. دييشيک سياسي باخيشلارلا يارانان تشکيلاتلار، اؤزگور اولمايان بير اولکه ده هئچ آنلام داشيمازلار و ايشلري يالنيز آيريليق سالماغ و گوج خرجله مک اولور. بونا گؤره، تشکيلات ياراديب و اونا بايراغ ياراتان شخصلر گله جکده اؤز ايشلري نين مسئولييتين داشيياجاقلار.

“بای بک” اؤنريلن توپلانتيني و بايراغ سئچيلمه سيني بير گرکلي گؤرو بيليب و وئريلن قرارا اوياجاغين بيلديرير.

اؤنريلن بايراغلاردان بيري “بای بک” طرفيندن اونايلانير و “بای بک” اونا سس وئرمک اوچون اؤز ايسته کي ن آچيقلايير. آما، بو او دئمک دييلدير کي “بای بک” اينديدن بايراغؤ تهميل ائتمک ايستير و ياخود بير تشکيلاتين طرفين ساخلير.

اؤنريلن بايراغلاردان بيري بيزيم گونوموزه و گلجگيميزه توخونان و ايستکلريميزي قارشيلايان بير بايراغدير کي ميللي بايراغيما بنزيير. او بايراغدا اولان آيپارا و ۸ بوجاقلي اولدوز قارا بويانيب. بو بايراغي رحمتليک ابوالفضل ائلچي بئی-ين طرحي آدلانديرانلاردا وار، اونو بوتؤو آذربايجان بيرليگي (ب.ا.ب) سئچن بايراغ آدلانديرانلاردا وار و بير چوخلو سؤزلرده اونون باره سينده ديللرده دير. “بای بک” بونلاري گؤزه آلير آنجاق اونلارين هئچ اولماديغيني و بايراغين يئني طرح اولماسيندا بيله قبول ائدير. ندن کي بو گون بيزي بير آرايا گتيرن سيمبول لازيمدير، بو بايراغ ائله بير کاراکتر داشيماقدادير.

توپلانتي مسئله سي اوچون سويداشلارا سسله نيريک و ميللي فعاللاري بو قونودا ايستکلي اولمالارين ريجا ائديريک. زامان گئتديکجه، يئني بايراغلار ياراناجاق و چئشيتلي بايراغلار آلتينا توپلاشان آذربايجانليلار بير-بيرينه دوشمان اولاجاقلار. بايراغ مسئله سي ياخين گونلرده بير دفعه ليک چؤزولمه ليدير. اوندان سونرا، سئنئر (مرز) و اليفبا قونولاري گوندمه چيخاريليب و چؤزولمه لي اولاجاقلار. بو ۳ مسئله بيزيم بيرليگيميزده اؤنملي رول اويناييرلار و گرکدير کي هر نه تئزراخ اونلارا کسکين جاواب الده اولونسون.

سورونلاريميزين اؤز اليميزده و تئزليقلا چؤزولمه سي، ميللي هرکاتيميز اوچون بؤيوک باشاري و گله جک اوچون يارارلي يؤنتم ياراتماقدير.

“بای بک” بو اؤنريني وئرير و اؤز گورشلرين آچيقجاسينا بيان ائدير.

بای بک
۰۵/۰۷/۲۰۰۸

اؤنريلن بايراغ: