Sunday, July 13, 2008



آذربايجان ميللي حرکتينده “بوتؤولوک” آنلاييشي و ميللي سيمگه مسئله سي - کورشات مرندلي

بير مودتدير اينتئرنئت سيته لرينده و ميللي فعاللار آراسيندا ميللي سيمگه مسئله سي دانيشيلير (قارا آي اولدوزلو آذربايجان بايراغي). دوغال اولاراق بو مسئله نين مووافيق و موخاليفلري واردير. مووافيقلر عومومييتله ميللي حرکتيميزي بين الخالق پلاتفورمادا تئمسيل ائتمک اوچون بير سيمگه يه و علامته احتيياج اولدوغونو و ميللي ايستيقلالا گئدن يولدا بوتون ميللي فعاللارين و هامي تشکيلاتلارين ساريلا بيله جگي بير موشته رک داياناغين ضروري اولدوغونو سؤيله ييرلر. هابئله اونلار دئييرلر کي گونئي آذربايجان موستقيل اولدوغو زامان قوزئي آذربايجانلا بيرلشينجه يه قدر بير بايراغا احتيياجي اولاجاقدير.

بو سؤزلر قايئت منطيقلي و عاغيلا باتاندير. آما ديگر ياندان مونتقيد کسيمين ده تنقيدلري منطيقلي و دوشوندوروجودور (بورادا تخريباتچيلارين جايديرما ايشلري، بلکه ميلتيميزين و ميللي حرکتيميزين گرچک قايغي کئشلريندن سؤز ائديريک).

ميللي سيمگيه اولان ان اؤنملي تنقيدلر بونلاردير:

۱) بو مسئله آذربايجانين بوتؤولوک آنلاييشينا ضربه وورور. آذربايجان ميلتي واحيددير و بايراغي دا بيردير. ائلجه ده بو مسئله ده اولو اؤندر رحمتليک ائلچي بئي-ين ” آذربايجانين گونئيينده يئني بايراق يارانميياجاق اورايا بو بايراق گئدئجئک، محمد امين رسولزاده-نين قالديرديگي بايراق ” سؤزونه ايستيناد ائديلير.

۲) بو بايراق اولو اؤندر رحمتليک ائلچي بئي طرفيندن اؤنريلمه ييبدير.

بو قايغيلار قايئت آيدين، يئرلي و خئييرخاهدير. من بير ميللي فعال کيمي بو مسئله ده اؤز فيکريمي بيان ائتمک ايسته ييرم.

عزيز موجادله آرخاداشلاريم، اصلینه باخاندا ميللي سيمگه نين وئريلمه سي نه آذربايجانين بوتؤولوک آنلاييشينا نه ده آذربايجان بايراغي نين بيرليگينه ترس دوشور و نه ده فيکير باباميز رحمتليک ائلچي بئي-ين سؤزونه ترسدير. بير طرفدن ده بو سيمگنين اؤنريلمه سينده رحمتليک ائلچي بئي-ين رولونو دانماق ايمکانسيردير. بئله کي:

اؤنريلن بو طرح بير يول بايراق دئييل سيمگه دير. ياني آذربايجان بايراغي دئييل گونئي آذربايجان ميللي حرکتينين سيمگه سي و نيشانه سي اولاجاقدير. ائلجه ده بو سيمگه نين قرافيکاسي بوتؤو آذربايجان بايراغي ايله عئينيدير و آرادا اساس بير فرق يوخدور. هابئله سيمگه نين اؤنري يازيسيندا دئييليبدير کي آذربايجان بيرلشيرکن قارا آي اولدوز آغاراجاق و بئلجه بوتؤو آذربايجان بايراغينا دؤنموشموش اولاجاق. ياني آنلاشيلديغي کيمي بورادا آذربايجانين بوتؤولوگو و بايراغين بيرليگينه ترس اولان بير شئي يوخدور.

سيمگه نين طرحينه گلديگيميزده ايسه بيلينديگي کيمي بو طرح ايلک دفعه ب.ا.ب تشکيلاتي (بوتؤو آذربايجان بيرليگي) طرفيندن چاپ ائديلن “مختصر آذربايجان تاريخي” کيتابيندا يايينلانيبدير. هاميميز بيليريک کي ب.ا.ب تشکيلاتي آذربايجانين بيرليگي آدينا قورولان ايلک تشکيلاتدير کي رحمتليک اؤندريميز و فيکير باباميز ائلچي بئي-ين شخصي نين تشببوسو ايله قورولوبدور. هابئله بو کيتاب چاپ ائديليرکن بئي اؤزو ساغ ايدي و ب.ا.ب تشکيلاتينين باشيندا دوروردو. بوردا بئله بير سوال گلير آدامين عاغلينا: “ياني بئي اؤز قوردوغو و باشيندا دوردوغو تشکيلاتدا نه اولوب بيتديگيندن او قدر خبرسيز ايدي کي بو تشکيلاتدا گونئي آذربايجان آدينا بير بايراق يايينلانيردي و بئيين خبري يوخيدي؟”. منجه بو ايمکانسيزدير و حتّی بئي-ه سايقيسيزليقدير.

کسينليکله بئي-ين بو مسئله دن خبري اولوبدور. و گنه ده منه گؤره بئي بو مسئله يه قارشي چيخماييبسا بير آنلامدا بو ايشي تائيد ائديبدير. ان پيس احتيمالي بئله دوشونسک و دئسک کي بئي-ين باشي چوخ قال اولوب و بو ايشدن خبري اولامييبدير!!!! (کي تاکيد ائديرم منجه بو ايمکانسيزدير) گنه ده چوخ بير شئي ده ييشمير. گونوموزده بير قوروم و يا قوروليشدا باش وئرن هر شئيدن او قورولوشون مودورو و باشقاني مسئول توتولور. دولاييسي ايله بئي ايستر ايسته مز بو طرحين اؤنريلمه سي نين مسئولو اولماز مي؟ چونکو ب.ا.ب تشکيلاتي بو طرحي يايينلارکن بئي اؤزو بو قورولوشون باشيندا ايدي!!!

ديگر اؤنملي بير مسئله بودور کي بوگون هر هانسي يئني بير طرحي بوتون تشکيلاتلاريميزا و فعاللاريميزا قبوللنديرمک ايمکانسيز کيمي گؤرونور چونکو اورتاليقدا نئجه بير آتموسفئر اولدوغونو هامييا آيديندير. آما بو طرح اورتايا قويولان ايلک طرح اولدوغو اوچون و هابئله رحمتليک ائلچي بئی-ه دوغرودان و يا دولايلي اولاراق باغلانديغي اوچون مئيداندا اولان ان مشروييتلي طرحدير کي نه کيمسه اونون اوزريندن رانت ساغلايا بيلر نه ايديعا ائدبيلر کي بو طرحي من اورتايا آتميشام.

عزيز موجادله آرخاداشلاريم؛ منجه دونيانين و بؤلگه نين بو کريتيک دؤنمينده کي صاباح نه اولاجاغي هئچ بللي اولماز تاريخي فورستلريميزي يانديرماماليييق و بير آز دا اولسا منم منمليکدن ال چکيب اورتاق بير ايشلر گؤرمه ليگيک. من بير ميللي فعال اولاراق بوتون تشکيلاتلاريميزي و ميللي فعاللاريميزي ميللي سيمگه طرحينه دستک وئتره يه چاغيريرام.

ياشاسين بؤيوک تورک ميلتي
ياشاسين بؤيوک آذربايجان
ياشاسين ميللي موجادله ميز

سايغيلاريملا؛
کورشات مرندلي
۱۰/۰۷/۲۰۰۸



Azәrbaycan Milli Hәrәkәti’ndә “BÜTÖVLÜK” Anlayışı vә Milli Simgә Mәsәlәsi



Bir müddәtdir internet sitәlәrindә vә milli fәallar arasında milli simgә mәsәlәsi danışılır(qara ay ulduzlu Azәrbaycan bayrağı). Doğal olaraq bu mәsәlәnin muvafiq vә muxaliflәri vardır. Muvafiqlәr umumiyәtlә milli hәrәkәtimizi beynәlxalq platformada temsil etmәk üçün bir simgәyә vә әlamәtә ehtiyac olduğunu vә milli istiqlala gedәn yolda bütün milli fәalların vә hamı tәşkilatların sarıla bilәcәyi bir müştәrәk dayanağın zәruri olduğunu söylәyirlәr. Habelә onlar deyirlәr ki Güney Azәrbaycan müstәqil olduğu zaman Quzey Azәrbaycan’la birlәşincәyә qәdәr bir bayrağa ehtiyacı olacaqdır.

Bu sözlәr qayet mәntiqli vә ağıla batandır. Ama digәr yandan muntәqid kәsimin dә tәnqidlәri mәntiqli vә düşündürücüdür (burada tәxribatçıların caydırma işlәri, bәlkә millәtimizin vә milli hәrәkәtimizin gәrçәk qayğı keşlәrindәn söz edirik).

Milli Simgә’yә olan әn önәmli tәnqidlәr bunlardır:

1) Bu mәsәlә Azәrbaycan’ın bütövlük anlayışına zәrbә vurur. Azәrbaycan Millәti vahiddir vә bayrağı da birdir. Elәcәdә bu mәsәlәdә ulu öndәr rәhmәtlik Elçibey’in “Azerbaycan’in Güneyinde yeni bayraq yaranmiyacaq oraya bu bayraq gedecek, Mehemmed Emin Resulzade’nin qaldirdigi bayraq” sözünә istinad edilir.

2) Bu bayraq ulu öndәr rәhmәtlik Elçibey tәrәfindәn önәrilmәyibdir.



Bu qayğılar qayet aydın, yerli vә xeyirxahdır. Mәn bir milli fәal kimi bu mәsәlәdә öz fikrimi bәyan etmәk istәyirәm. Әziz mücadәlә arxadaşlarım, әslinә baxanda milli simgәnin verilmәsi nә Azәrbaycan’ın bütövlük anlayışına nә dә Azәrbaycan bayrağının birliyinә tәrs düşür vә nә dә fikir babamız rәhmәtlik Elçibәy’in sözünә tәrsdir. Bir tәrәfdәn dә bu simgә’nin önәrilmәsindә rәhmәtlik Elçibәy’in rolünü danmaq imkansırdir. Belә ki:

Önәrilәn bu tәrh bir yol bayraq deyil simgәdir. Yanı Azәrbaycan bayrağı deyil Güney Azәrbaycan Milli Hәrәkәti’nin simgәsi vә nişanәsi olacaqdır. Elәcә dә bu simgәnin qrafikası bütöv Azәrbaycan Bayrağı ilә eynidir vә arada әsas bir fәrq yoxdur. Habelә simgәnin önәri yazısında deyilibdir ki Azәrbaycan birlәşirkәn qara ay ulduz ağaracaq vә belәcә bütöv Azәrbaycan bayrağına dönmüşmüş olacaq. Yanı anlaşıldığı kimi burada Azәrbaycan’ın bütövlüyü vә bayrağın birliyinә tәrs olan bir şey yoxdur.

Simgәnin tәrhinә gәldiyimizdә isә bilindiyi kimi bu tәrh ilk dәfә BAB Tәşkilatı (Bütöv Azәrbaycan Birliyi) tәrәfindәn çap edilәn “Muxtәsr Azәrbaycan Tarixi” kitabında yayınlanıbdır. Hamımız bilirik ki BAB tәşkilatı Azәrbaycan’ın birliyi adına qurulan ilk tәşkilatdır ki rәhmәtlik öndәrimiz vә fikir babamız Elçibәy’in şәxsinin tәşәbbüsü ilә qurulubdur. Habelә bu kitab çap edilirkәn Bәy özü sağ idi vә BAB Tәşkilatı’nın başında dururdu. Burda belә bir sual gәlir adamın ağlına: “yanı Bәy öz qurduğu vә başında durduğu tәşkilatda ne olub bitdiyindәn o qәdәr xәbәrsiz idi ki bu tәşkilatda Güney Azәrbaycan adına bir bayraq yayınlanırdı vә Beyin xәbәri yoxidi?”. Mәncә bu imkansızdır vә hәtta Bәy’ә sayqısızlıqdır. Kәsinliklә Bәyin bu mәsәlәdәn xәbәri olubdur. Vә gәnә dә mәnә görә Bәy bu mәsәlәyә qarşı çıxmayıbsa bir anlamda bu işi tәid edibdir. Әn pis ehtimalı belә düşünsәk vә desәk ki Bәyin başı çox qal olub vә bu işdәn xәbәri olamyıbdır!!!! (ki tәkid edirәm mәncә bu imkansızdır) gәnә dә çox bir şey dәyişmir. Günümüzdә bir qurum vә ya qurulışda baş verәn hәr şeydәn o quruluşun müdürü vә başqanı mәsul tutulur. Dolayısı ilә Bәy istәr istәmәz bu tәrhin önәrilmәsinin mәsulu olmaz mı? Çünkü BAB tәşkilatı bu tәrhi yayınlarkәn Bәy özü bu quruluşun başında idi!!!

Digәr önәmli bir mәsәlә budur ki bugün hәr hansı yeni bir tәrhi bütün tәşkilatlarımıza vә fәallarımıza qәbullәndirmәk imkansız kimi görünür çünkü ortalıqda necә bir atmosfer olduğunu hamıya aydındır. Ama bu tәrh ortaya qoyulan ilk tәrh olduğu üçün vә habelә rәhmәtlik Elçibәyә doğrudan vә ya dolaylı olaraq bağlandığı üçün meydanda olan әn mәşruiyәtli tәrhdir ki nә kimsә onun üzәrindәn rant sağlaya bilәr nә iddia edәbilәr ki bu tәrhi mәn ortaya atmışam.

Әziz mücadәlә arxadaşlarım; mәncә dünyanın vә bölgәnin bu kritik dönәmindә ki sabah nә olacağı heç bәlli olmaz tarixi fürstlәrimizi yandırmamalıyıq vә bir az da olsa mәnәm mәnәmlikdәn әl çәkib ortaq bir işlәr görmәliyik. Mәn bir milli fәal olaraq bütün tәşkilatlarımızı vә milli fәallarımızı Milli Simgә tәrhinә dәstәk vetrәyә çağırıram.

Yaşasın Böyük Türk Millәti

Yaşasın Böyük Azәrbaycan

Yaşasın Milli Mücadәlәmiz



Sayğılarımla

Kürşat Mәrәndli

10.07.2008

0 Comments:

Post a Comment

<< Home